المخرج أكرم فريد: كنت بحلم أكون ممثل لكن مجموعي جالي طب بيطري
قال المخرج أكرم فريد، أنه كان يحلم ليكون ممثل، بس كان مجموعي كبير والتنسيق جالي طب بيطري، فأهلي أجبروني أدخل كلية الطب وقالولي تبقى دكتور ولا تدخل معهد فنون مسرحية؟ لكني ما تخلتش عن حلمي وقررت بعد ما خلصت الكلية أدخل المجال اللي بحبه وقدمت في معهد السينما، جاء ذلك خلال مداخلة هاتفيةً لبرنامج "فاكرني يا حظ" تقديم إنجي أنور على نغم إف إم.
المخرج أكرم فريد لنغم اف ام: كنت بحلم اكون ممثل لكن مجموعي والتنسيق جالي طب بيطري
وأضاف: قالولي قدم مونتاج لما روحت معهد السينما بأكاديمية الفنون، وبعدها أنت أخدت فرصتك في التعليم بعد ما أخدت شهادة البكالوريوس، والحقيقة سقطوني، فما دخلتش مونتاج.
وبعدها تعرفت على المخرجة هالة لطفي وكانت ساعتها طالبة في سنة ثالثة وكانت خريجة سياسة واقتصاد، والحظ خدمني إني أشوفها في معرض الكتاب، وقالت لي إنت خسران إيه؟! التقديم في معهد السينما فتح، روح وقدم، ولما روحت أقدم تاني مرة في المعهد، كان في ساعتها وسايط كتير قوي، وكنت قلقان، ولكن كان ماسكه وقتها المخرج العظيم علي بدرخان، ووافق عليا أنا وتامر محسن، وحاولوا يثنوه عن رأيه ولكنه صمم علينا، وهو بداية الحظ الجميل إني أتواجد في معهد السينما وأدرس، ولولا وجوده وإننا تعلمنا منه علي المستوي الفني والأخلاقي ما كنتش دخلت، وهو فعلا كان الأب الروحي حتي هذه اللحظة.
وعن دراسته في كلية الطب البيطري فقال: " لما دخلت طب بيطري، عرفت في الخمس سنين دراسة، أنا عاوز أروح فين وبدل ما كنت بحلم بمعهد فنون مسرحية، بقيت بحلم أكون مخرج وأدخل معهد السينما، والحمد لله الأربع سنين دراسة جيبت فيهم امتياز مع مرتبة الشرف واتعينت معيد كمان ".
واختتم قائلا احب أقول إن تامر حسني حبيبي ومن أكتر الناس اللي شايفهم موهوبين، وبيحب يكون موجود في كل تفصيلة في الأغنية سواء الأغاني أو اللحن أو التوزيع والآلات المستخدمة، وهو حد مجتهد جدا جدا، وخفة الدم في الأفلام هي واحد من عشرة من خفة دمه في الحقيقة، وربنا حباه بحب الناس والموهبة، وطالما تامر حسني شايف نفسه في الإخراج فمن حقه يشوف ويجرب، وزي ما في مجدي يعقوب، ودكتور الغلابة، فيه دكاترة ما حققتش أي حاجة، والنجاح مش مرهون بكلية معينة، المهم انت داخلها ليه وعايز منها إيه، عشان كده بنصح كل خريج ثانوية عامة لازم يحب اللي بيعمله ويقدمه بحب واستمتاع، أحلم واستمتع بمشوارك وحلمك وشغفك، دي نصيحتي لكل طالب لسه بيبدأ طريقه.
