صاحب عقار طهطا المنهار: البيت وقع علينا.. وقاعدين عند جارتنا (فيديو)

التقت "مصر تايمز" بصاحب العقار المنهار، مساء أمس الثلاثاء، في مركز طهطا شمال محافظة سوهاج.

وقال "عادل .ا" صاحب العقار، إن “البيت بدأ في السقوط ”طوبة طوبة" على حد تعبيره؛ في تمام الساعة 12 صباحا، معلقا: "من لطف الله أننا كنا قاعدين بره البيت في الهواـ ولكن سما بنتي كانت جوا البيت نايمة، زوجتي جريت عليها أخدتها مفيش خطوتين والبيت انهار".

وما لفت الأنظار أن المنازل بالمنطقة المشار إليها تعاني من الإهمال والعشوائية والشروخ بالحوائط، مما يعني أن المنزل كان له بوادر تشير بانهياره يومًا ما، وتقول ربة المنزل معلقة: "البيت كان مليان شروخ روحت للوحدة المحلية بلغتهم بيه قالولي تعالي بعد ٢٠ يوم، حاجة عيالي كلها جوا كتب البنات وملابسهم حتي الأجهزة الكهربائية اتكسرت كلها".

أهالي طهطا رجولة وجدعنة.. "عرضوا عليا بيت وهدوم"

وتآلفت قلوب أهل المنطقة وعرضوا المساعدة على الأسرة المنكوبة، وإن كان ظروفهم المعيشية الصعبة هي ذاتها ظروف صاحب المنزل، جميعهم منازلهم قديمة وبها شروخ وتحتاج للترميم.

وفي هذا الصدد، استكملت السيدة: "احنا قاعدين عند جارتنا لأنها لوحدها زي أمي مليش غيرها، جيراني عرضوا عليا هدوم للعيال وأكل كل يوم، ولكن مش قادرة أزود عليهم أكتر من كدا".

ويقول "محمد .م" جارأصحاب المنزل المنهار: "كلنا معاه وإن كان ما باليد حيلة، احنا عايشين في عشوائيات مش لاقيين سكن كريم، اللي في إيدينا نبعت لهم أكل نعرض عليهم هدوم وربنا يكرمنا جميعًا".

جمعية أولاد موسي بطهطا: مش هنسيبهم

وقال محمد موسي، المسئول بجمعية أولاد موسي بمركز طهطا: "احنا معاهم مش هنسيبهم، جيت قيمت المنزل وهنساعدهم في مسكن وحياة اجتماعية كريمة، واجبي أقوله انا معاك وأنا فعلًا معاه لحد ما يحل مشاكله".