استاذ الصحة النفسية بجامعة عين شمس :الطفل يتأثر بالطاقة السلبية للأم في فترة الحمل
قالت دكتورة ناهد شوقي استاذ الصحة النفسية بجامعة عين شمس إن الأم بتمر بمراحل نفسية كتير من وقت الحمل لبعد الولادة في أول فترة في الحمل بتخاف من اي تغير بيحصل في شكلها، بعدين بيحصل تغير هرموني بيزود من التوتر والقلق وزيادة ضربات القلب واضطرابات المعدة والغثيان والصداع، جاء ذلك خلال مداخلة تصريحات تلفزيونية.
و أضافت نتيجة التمدد في كل أجزاء الجسم بيزود إحساس الأمهات بالآلام في فترة الحمل، وبتتغير حالتها النفسية وبتبقى مش متقبلة شكلها ولبسها، ومش متقبلة بعض الروايح وده بيزود عصبيتها وانفعالها ، وللاسف زيادة هذه الأعراض بيسبب اكتئاب الحمل.
أما عن الطفل في فترة الحمل بيتأثر بأكل الأم وانفعالاتها ومشاعرها، و المشاعر السلبية في فترة الحمل بينتج عنها أطفال مصابين بالتوحد والإعاقة، و الطفل بيعرف أمه من ريحتها عشان كده الأطفال بتميل لعيلة الأم لإنها نفس الريحة.. وعشان كده بعد الولادة مباشرة الدكتور بيحط الطفل على بشرة والدته عشان يعرفها.
واختتمت بنصيحة للأمهات اللي بترضع صناعي، وقت الرضاعة تاخد الطفل فى حضنها عشان يحس بالأمان.
