مراد فكري يبرر تصريحات والده عن سعيد صالح"كبر السن والعفوية فى الكلام"
برر الفنان مراد فكري، نجل الفنان فكري صادق تصريحات والده عن الفنان الكبير سعيد صالح، وقال خلال تصريحات تلفزيونية أنه"ممثل عادي وفيه زيه كتير" وردت عليه إبنته قائلة:" إيه اللذاذة دى يا استاذ فكرى، انا مش هرد على حضرتك لأن اللهم لك الحمد الكومنتات قايمة بالواجب"
ليرد مراد فكري على صفحته على الفيسبوك قائلا"اختى الغالية و الفنانة بنت الاصول هند سعيد صالح، طبعا انتى تعلمى جيدآ عشقى و احترامى و تقديرى للنجم الكبير سعيد صالح و تاريخه منذ صغرى حتى تخرجنا انا و انتى منذ سنوات زملاء و اخوات من المعهد العالى للسينما ".
تابع:"احنا اكبر من اننا نتكلم على صفحات الفيس بوك يا بنت عمى و عمنا كلنا و والدى بنفسه قال فى كذا لقاء قبل كدة أن علاقته بالفنان سعيد صالح و عادل امام كانت علاقة صداقة بعيد عن الفن و اشتغلوا سوا كتير و كل واحد مننا ممكن يقول كلمة عفوية دون قصد غلط ..و خصوصآ لما تتطلع الكلمة من جيل والدك و والدى لأن دة جيل عظيم و فاهم و واعى و خصوصآ انهم جيل واحد كمان و الجيل دة معروف بالحب اصلأ لحد دلوقتى كمان".
أضاف مراد فكري:" ان كانت كلمة طلعت غلط او سؤ تفاهم حصل بشكل مفاجئ مش معناه انه غلط لا سمح الله، أو يقلل من شأنه رحمة الله عليه و راعوا يا جماعة كبر السن و العفوية فى الكلام للناس الكبار .. الناس دى فنانين كبار و اكبر من اننا نلوم عليهم او نحاسبه بالكلمة .. لأن سعيد صالح دة نجم كبير و فكرى صادق فنان كبير برضو .. و شكرآ المهتمين و عارفين ان دة مش طبع والدى و ان عمره فى الوسط الفنى ما حد زعل منه .. الحمد لله احنا ناس فى حالنا مش بتوع مشاكل ولا تريند علشان الناس تعرف مين فكرى صادق او نقيس بالتريند شعبية نجم كبير زى سعيد صالح ".
وأشار مراد فكري:"بس احتراما منكم و رجاء و ليس امر من حضراتكم .. بلاش نكبر المواضيع و نشمت فى بعض بالسرعة دى و نعلق لبعض المشانق علشان ممكن الحكاية تتفخم و يبقا موقف و يزعل ناس و اخوات و أصدقاء من بعض عشرتهم و صداقتهم قد عمر جيل كامل زى جيلنا الحالى .. و ستستمر العلاقة الطيبة بين الأبناء لأخر العمر بأذن الله و لن تتغير او تفسد بسبب كلمة او وجهة نظر اتقالت على الهوا بشكل عفوي.. دون مونتاج او تجميل للكلام من فنان له تاريخه و أعماله و عمره يتجاوز السبعين الحمد لله و هو والدى الفنان فكرى صادق".
واختتم مراد كلامه:"والله يا جماعة إللى حصل دة بيحصل فى معظم البرامج المسجلة و بيحصل اكتر من كدة كمان و كلنا عارفين و فاهمين .. و بيتم تظبيط الكلام كله فى المونتاج قبل عرض حلقة الضيف و اختى هند سعيد صالح تعلم هذا من خلال عملها مونتيرة لها بصمتها فى فن المونتاج لأكثر من برنامج لكن برنامج الاستاذة لميس الحديدى .. برنامج على الهواء مباشرة لو كانت حلقة متسلة ماكانش حصل كل دة .. الحمد لله و كامل اعتذارى بشكل اخوى لأختى الغالية هند سعيد صالح و للنجم الراحل سعيد صالح.
