مواطن يتهم توكيل سيارات "عز العرب" بتعريض حياته للخطر بعد اشتعال النيران فى عربيته
اتهم شاب صاحب السيارة التى اشتعلت بها النيران منذ عدة أيام ويدعى "شريف الديب" شركة التوكيل فولفو عز العرب للسيارات بتعريض حياته للخطر، عندما ذهب لهم لصيانة تكييف سيارته ثم انفجرت السيارة وتحولت لـ"خردة"
وسرد شريف تفاصيل تعرض سيارته لاشتعال النيران وهو بداخلها وتحولها لخردة ، حيث كشف إنه أثناء سيره فى الطريق شعر فجأة بحرارة شديدة داخل سيارته وجاء ينظر أمامه تفاجأ بوجود كثافة كبيرة من الدخان يخرج من كابوت العربية وعلى الفور نزل من سيارته ليري أين المشكلة فانفجرت سيارته وتصاعدت ألسنة اللهب منها أمام أعينة التي تملأها الدموع والحسرة على سيارته التي جمع أموالها بصعوبة وتحولت لصاج حديد ليس له قيمة.
وقال " تقدمت بمحضر برقم 1519 جنح رأس غارب ضد شركة فولفو عز العرب للسيارات، وقال في المحضر: “أنا عربيتي ولعت وأنا ماشي والنار خلتها حتة حديدة بعد ما طلعت من توكيل فولفو عز العرب علشان كنت بعمل صيانة للتكييف ولما خلصوا صيانة التكييف قالولى بمجرد انك مضيت باستلام العربية لو ولعت قدام باب التوكيل مش قصتنا بمجرد خروجك من باب التوكيل بيخلى مسؤليتنا تماما”.
وتابع: " لما روحت يوم 26 يوليو اللى فات أعمل صيانة لتكييف العربية وبعد ما خرجت من التوكيل وطلعت على الطريق لقيت فاجأة النار بتطلع من الكبوت فنزلت جري وأول ما نزلت النار مسكت في كل حته في العربية وانفجرت وشوفت الموت بعيني وأنا راكب العربية اللى المفروض انها اكتر أمانًا في العالم بسبب إهمال توكيل عز العرب .
وأضاف: “بناءا على قرار النيابة العامة وتقرير من الأدلة الجنائية يقال أن السبب الحريق هو ماس كهربائي في الوصلات اللي على شمال الموتور قدام و انت واقف قدام العربية أدى إلى اشتعال الموتور و العربية بالكامل بدرجات متفاوتة الشدة و ده مكان الكمبريسور ووصلات للتكييف ده المكان اللي اتعمل فيه الصيانة جوا مركز عز العرب فولفو”.
واستكمل : “روحت التوكيل علشان اعرفهم اللي حصل و أشوف هايعملوا ايه في الكارثة دى وشوفت أسوا خدمه ما بعد البيع في حياتى وبيقولولي لو كانت ولعت في التوكيل كان ممكن نساعدك رغم أن تقرير الأدلة الجنائية في المحضر يثبت مسئوليتهم الكاملة عن الواقعة واللي هو اثبت ان مصدر النيران هو وصلات الكهرباء اللي موجودة على شمال الموتور ودي المنطقة اللي اشتغلوا فيها بالظبط، ومش عايزين يعترفوا انها مسئوليتهم، بيقولوا الإمضاء بتاعتك بالاستلام بتخلى مسؤليتنا تمامًا”.
