سهير جودة: أغنية باسم الله بتديني طاقة ولو سمعتها مليون مرة هفضل مستمتعة

أعربت الإعلامية سهير جودة، عن سعادتها بحلول ذكرى حرب أكتوبر المجيدة، الذي انتصر فيها الجيش المصري على قوات الاحتلال الاسرائيلي، قائلة: روح اكتوبر هي اللي المفرروض تبقى معانا كلنا على كل المستويات، والفن كان معبر صادق عن الروح دي، لكن طول الوقت احنا محتاجين اننا نسعيد روح أكتوبر.

وقالت سهير خلال برنامج الستات، إنها تنتظر يوم ذكرى نصر أكتوبر غدا عن طريق الإذاعة، مشيرة: هستنى بكرة الاذاعة، وأغنية بسم الله الله اكبر دي من الحاجات اللي بتديني طاقة، بحب اسمعها، لو سمعتها مليون مرة هفضل مستمتعة وسعيدة، عبرنا الهزيمة يا مصر يا عظيمة، صوت شادية الرائع، الحان بليغ حمدي.

وتابعت سهير جودة: صوت وردة في اغنية وانا على الربابة بغني، الأغنية دي اتعملت في ساعات، فالفن كان قد ايه حاجة حقيقية وصادقة ومعبرة، فالموسيقى والألحان والكلمات والروح حاجة تانية، الزمن بيفرق.

وأشارت: لازم نبتدي نعلم الاجيال الجديدة يعني ايه نصر اكتوبر، المدرسين في المدرسة والاهل لازم يتكلموا معاهم عن نصر أكتوبر، ده فرض عين على الجميع مش فرض كفاية، ولازم الاجيال الجديدة يبقى عندها عزة وفخر بنصر أكتوبر، وليه لازم نستحضر روح اكتوبر دايما، ده واجب على كل الاباء والمعلمين.

واردفت: خلوا الولاد يخاصموا المهرجانات، او اي نوع تاني من الاغاني اللي بيسمعوها، وكل التحية لانواع الموسيقى المختلفة، لكن يوم نصر اكتوبر مختلف، وسمعوهم الاغاني الوطنية، شوفوا قد ايه كان عندنا ناس عظماء في الموسيقى، وسعيدة بتكريم علي اسماعيل في الدورة 31 من مهرجان الموسيقى العربية، ولازم نفخر بأننا عندنا اسم زيه في مصر، دي فرصة هما هيستمتعوا بجد بالنوع ده من الموسيقى اللي فيها حماس وحب.