"البلد كلها شاركت في جنازته".. تفاصيل مأساوية يكشفها والد الطفل فادي بسوهاج.. فيديو
شهدت قرية العوامر بحري بمركز جرجا جنوب محافظة سوهاج، واقعة مأساوية، عقب وفاة طفل ، يدعي السيد عبد العزيز" وشهرته "فادي" إثر سقوطه من أعلى سيارة ربع نقل، أثناء عودته للمنزل بعد انتهاء اليوم الدراسي.
وروى والد الطفل خلال لقائه مع "مصر تايمز" تفصيل كواليس اليوم الأخير بحياة الطفل قائلا "خبطوا عليا قالولي ابنك وقع مجاش في بالي أنه راح".
أضاف" فادي عادة بيصحي يصلي الفجر حاضر، اليوم دا مصحيش وكمان بيقوم يجهز للمدرسة لوحده اليوم دا مقامش، راحت أمه تصحيه نزل سلم على كل أهله كأنه بيودعهم، وراح مدرسته شوية وزمايله خبطوا على الباب قالولي إبنك وقع ، وبالفعل جريت عليه مقدرتش المسه لقيته واقع على الأرض شوية نزيف من الفم بس مش متعور، خاله أخده المستشفى وعرفت أن أمر الله نافذ".
واستكمل :"لما أصحابه جم العزا قالولي الصبح المدرس قاله بس يا فادي وإلا هطلعك بره، قاله ساعات وهمشي من الدنيا كلها، إبني بطبعه مش بيرد ولا بيشاغب بس كان حاسس أنه هيمشي، حتي لما ركب العربية ربع النقل بسبب قلة المواصلات عند مدرسة المحاسنة، جه ينزل فضل يقول خلاص المعاد جه صحابه مسكوا فيه بس قفز وأمر الله نفذ".
جفف والد فادي دموعه وقال" فادي كان دايما يقول نفسي أكون شهيد، ترد أمه تقوله شهيد إزاي وأنت وحيد مش هتدخل جيش، لحد ما بقي شهيد فعلًا، الرسول صلى الله عليه وسلم قال (من خرج في طلب العلم كان في سبيل الله حتى يرجع)".
وشارك الآلاف من أهالي القرية بجنازة شهيد العلم فادي، حيث ودعه أصدقائه ومعلميه وأبناء القرى المجاورة في مشهد مهيب يدمي القلب.
