مي حلمي تهاجم ياسمين الخطيب بسبب ياسمين عز: يا ختي عيشي عيشة أهلك
هاجمت المذيعة مي حلمي المذيعة ياسمين الخطيب، بسبب ما كتبته الأخيرة عن ياسمين عز مقدمة برنامج "كلام الناس" على قناة MBC مصر.
ونشرت مي حلمي جزء من كلام ياسمين الخطيب، وكتبت معلقة عبر حسابها على Facebook: " ماعنديش أدنى شك غير الي تقول كده علي زميلتها واحده منفسنه عليها مش أكتر".
وأوضحت: "ما البرامج كتير والهبد كتير، اقلبي يا حببتي واتفرجي علي رضوى الشربيني مدام ياسمين مش عجباكي، ولا ياسمين عز وجعاكم؟".
وتابعت مي حلمي: "ماتتفرجوا علي بقيت البرامج، إزاي تحاربي ست زيك ولا عشان إنتي قاعده وهي بتشتغل؟ فالهريه والنكته شغاله عليها".
ودافعت عن ياسمين عز قائلة: "هي حرة في رأيها، يدوس علي السجادة يدوس علي وشها هي حرة، وكل واحدة حرة تعامل جوزها إزاي، ولو بتنصحهم يبقوا كويسين مع إجوازتهم دي حاجة حلوة مش وحشة".
وأردفت: " أنا عن نفسي بحب ياسمين، وليه نكسر في واحدة نجحت انضفو بقي وخليكي منك ليها في نفسك، إعرفوا انجحوا الأول وأبقوا اتكلموا علي غيركم".
وعادت مي حلمي لتتحدث عن تعليق ياسمين الخطيب قائلة: "وإيه الطريقة دي بتاعت يع وبلدي، إيه ياختي عيشي عيشه أهلك واحترمي زميلتك، ما أجرمتش، ولا لازم تطلع تقول إدي جوزك بالشبشب عشان تتبسطي، اه آسفه أصلها مسمعه فمزعله الفشلة".
وواصلت دفاعها عن ياسمين عز: " هتقولولي ناجحة في إيه ؟ اه ناجحة وبتتفرجوا عليها، ومدام بتتفرجو عليها وبتجيبو سيرتها تبقي ناجحة، واما تتكلم عليها واحدة بتحكها في المذيعات ومش عارفة، تبقي ياسمين نجحت".
واختتمت حديثها قائلة: "وريحي يابتاعت ال يع وريحي يا منفسنة منك ليها، يمكن لو خلتيه يمشي علي السجادة ماكنش طفش".
وكانت ياسمين الخطيب قد انتقدت ياسمين عز قبل أيام وكتبت عبر فيسبوك، تناقش تصريحاتها، وقالت: " شيء مؤسف جداً، ومثير للغثيان، أن تتحدث اعلامية على قناة مرموقة، عن حسن معاملة الزوج، فتقصرها على: سيبيه يدوس على السجادة، وشيلي انتي كيس الزبالة، واديله ورك الفرخة! حاجة بلدي ومقرفة جداً".
وأكدت: "يعني يا ست لو عايزه تنحازي للرجالة عشان الترند -إللي مش هايدوم- اتكلمي عن مشاكل الرجال الحقيقية، عن مصاريف الزواج المبالغ فيها، والطلبات إللي بتقسم ظهر الشباب، من مهر وشبكة وخلافه، عن مشكلة الرؤية للرجال المطلقين، إللي مش بيشوفوا عيالهم أكتر من ساعة أسبوعياً في أقسام الشرطة، اتكلمي عن المشاركة، عن المودة والرحمة".
