الرئيس السيسي: كل اللي اتقال في المؤتمر الاقتصادي أي طالب في سياسية واقتصاد ممكن يقوله.. كرم الله على مصر كان فوق الخيال.. وأي موضوع عاوز أخلصه بروح للجيش

قال الرئيس عبد الفتاح السيسي خلال كلمته في الجلسة الختامية للمؤتمر الاقتصادى، اليوم:"خليني أرحب بيكم وأنا سعيد بالنقاش اللي تم"، مضيفا:"لما أطلقنا الحوار الوطني في أبريل، البعض تصور إنه سياسة، ولا بأس، لكن كان الهدف إننا نسمع بعض، في ظل الظروف، محتاجين نكون شايفين بعض، حتى رغم الاختلاف".

وتابع:"قلت كلام في بداية المؤتمر، ناس قالولي تقصد إيه، انت اتكلمت في موضوعات أخرى، أنا كنت شايف إنها متصلة، لما اتكلمت عن البيئة السياسة، هل البيئة في مصر والإقليم تتيح لنا؟، اوعوا حد يزعل مني، كل المقترحات اللي اتقالت، أي طالب في كلية سياسة واقتصاد، بيتكلم فيها، لكن إزاي تعملوها، كلامي هيبقى كده".

وأضاف الرئيس السيسي: "كل الكلام اللي تم التوافق عليه، ملتزمين إننا نعمله، معملناش الحوار عشان نستهلك جهدكم وجهدنا، اللي اتقال مقدر ومحترم، كدولة وحكومة ملتزمين، لا بد للمؤتمر ده يكون فيه آليات مستقرة عشان نقدر ننفذ لو قابلتنا مشكلة".

قال الرئيس عبدالفتاح السيسي، إن المواطن عليه الذهاب إلى حديقة الحيوانات، للوقوف على حقيقة الأوضاع في مصر.

وأضاف الرئيس السيسي خلال كلمة، ضمن فعاليات الجلسة الختامية للمؤتمر الاقتصادي مصر 2022، اليوم الثلاثاء: "عاوزين تعرفوا مصر عاملة إزاي روحوا حديقة الحيوان، شوفوا حجم التردي والمنشآت والسلبيات والتعب".

وتابع الرئيس السيسي: "حد بيقول ما تاخد الحديقة تعملها، قلت لا أنا أعمل 10 حدائق ومعملش حديقة بالطريقة دي، والناس تقول الحديقة والخضرة والأسود الجميلة، زي ما حصل في أنطونيادس.. طب روح شوفها بس، ولما نقول خش على المتنزه، يردوا بقالنا 25 سنة ميصحش كده".
 

وقال الرئيس عبد الفتاح السيسي، إن الدولة نفذت الكثير من مشروعات البنية التحتية، وبات الأمر في يد القطاع الخاص الذي باتت الفرصة أمامه للعمل، موضحاً إن الحكومة تبذل جهودا جبارة، لكن أي مشروع يرغب في إنهائه يتوجه للجيش.

الرئيس السيسي: "كرم الله على مصر كان فوق الخيال"

وقال الرئيس عبدالفتاح السيسى، رئيس الجمهورية: "فى ناس بتقول أنت بتتكلم عن ربنا كتير ليه، قولتلهم حبيبى وغالى عليا، وأنا اللى شايف هو عمل إيه معاكم، ممكن تكونوا شايفين بس أنا شايف أكتر، والله والله والله كرم ربنا على مصر فوق خيالكم".

أضاف الرئيس السيسي، خلال الجلسة الختامية للمؤتمر الاقتصادى – مصر 2022، اليوم الثلاثاء: "أنا بتكلم بكل احترام وحب عشان ربنا يقبلنى ويقبل ما أفعله فى مصر، يا رب يكون بيحبنى بصحيح".

وتابع: "بيان 3 يوليو كان هدفه المحافظة على الكيان الهش للدولة المصرية وكيانها حينها بما فيهم الفصيل دا لأجل خاطر مصر؛ لأنها مش مستحملة أكثر من كده خراب، كنت ببقى موجود فى مجلس الوزراء ويقولوا ليا عايزين نحافظ عليك وأنت الأيقونه بتاعتنا وأنت البطل الجميل، هو البطل خلاص بقى ولا إيه؟".