زوج "صفاء" ضحية الإهمال الطبي بمستشفى قويسنا: "ادوني رحم مراتي ادفنه وجواه ابني والدكاترة عرضوا عليا فلوس عشان اتنازل"

قال زوج صفاء، ضحية الإهمال الطبي بمستشفى قويسنا بمحافظة المنوفية، إنهم تعرضوا  للمعاملة السيئة من الأطباء والتمريض، وإن زوجته بمجرد شعورها بالتعب جرى نقلها للمستشفى: "نقلتها المستشفى علشان كانت تعبانة، وبعد عذاب قالولي مراتك دخلت العمليات، من 10 الصبح لـ7 بالليل ومحدش عارف حاجة ولا شايف حاجة، وكلهم بيهدوني واما مش عارف حاجة".

أضاف خلال بث مباشر لـ"مصر تايمز"، أنني فوجئت بهم يطلبون دم: "قالي مراتك كانت بتموت واتكتب ليها عمر جديد، وعاوزين دم ومش هتلاقيه بسهولة، فبقوله أعمل إيه؟، وكنت عاوز أنجدها، فقالي روح مستشفى بركة السبع أو القاهرة، فقلت ليه هات دم وخد مني فلوس، وجابوا الأمن وقفوه على باب غرفة العمليات، وكل ده وأنا مش فاهم حاجة".

وتابع: "لقيت الدم متوفر بمستشفى استثماري وغالي وهيعمل الكيس 750 جنيه، فقلت ليه خد أي ضمانات علشان أنقذ مراتي، وخدت الدم وجريت على المستشفى قالولي مراتك طلعت العناية المركزة، وخدوا الدم وطمنوني، وكل ده مش عارف حاجة، ومقالوش ليا إنها داخلة العمليات أصلا، ومكنتش عارف هما بيعملوا إيه، ولقيت الدكتور بيقولي ربنا يعوض عليك، فقالي كنا في العمليات، والعملية فتحت معايا وشيلنا الرحم والأمعاء وعملنا تحويل مسار".

أوضح: "لقيت مراتي في غيبوبة كاملة، وفيه إهمال وقالي ربنا يخلي بناتك ليك، وكان كل همي وتركيزي، إن مراتي تخرج بالسلامة، ومفكرتش في أي حاجة من اللي قالها، وفوجئت بعد ما هديت، أفكر وقلت إزاي؟، مراتي داخلة إجهاض، فاستأصلوا الرحم، فطلعت على قسم اشلرطة عملت بلاغ، ورحت النيابة وبدات التحقيقات، فوجئت أنهم جايبين إقرار ومراتي ماضية عليه، وفيه وصف العملية واستغربت أنا مراتي مبتعرفش تمضي؟، ولا أنا".

استكمل: "طلعت اشتكيت علشان حق مراتي ميضيعش، وحصل إهمال كبير ومراتي تعرضت للإهمال، وبقيت أروح يدوها علاج مسكن بس، وادوني رحم مراتي ادفنه وجواه ابني والدكاترة عرضوا عليا فلوس عشان اتنازل، لكن أنا مش هتنازل عن حقها".

تابع: “لفيت بمراتي على المستشفيات، والدكاترة قالوا محتاجة عمليات، الرحم اتشال خلاص لكن تحويل المسار ممكن يرجع بس العمليات مكلفة”.