"كنت هفقد النطق".. سيدة تفضح إهمال أعمال الصيانة بـ ZEDPark ونجاة ابنتها من الموت
حذرت إحدي السيدات من ملاهي ZEDPark بسبب إهمال أعمال الصيانة رغم ارتفاع أسعار التذاكر والألعاب وبالرغم من ذلك هناك حالة من الإهمال.
"كنت هفقد النطق".. سيدة تفضح إهمال أعمال الصيانة بـ ZEDPark ونجاة ابنتها من الموت
وقالت السيدة فى شكوتها ،"احذرو من ZEDPark -زيد بارك خالي بالكوا من أطفالكم روحت انا وابني وبنتي وصاحبتي وابنها zed park وطبعا احنا عارفين ان زيد بارك مكان احنا بنروحه عشان نلاقي فيه خدمه كويسه وامن وامان لأولادنا مش مهم بكم بس المهم يبقي فيه امان يعني حضرتك لًو عندك طفلين هتحجز 2 Tickets بس 200 جنيه الواحده وكده بعد الخصم وبعد كده تدخل علي كل لعبه هيقفوا عندها ب 100 جنيه يعني حضرتك لو معاك طفلين اقل حاجه هتصرفها 4000 جنيه يعني كأنك في ديزني باريس كل ده مش مهم “.
وتابعت ،" المهم دخلوا ولادي لعبه العربيات الكهربائية وشويه كده كل شويه نلاقي عربيه فيها مشكله يعني عربيه بطيئة عربيه مش شغاله فجأة لقينا ماس كهربائي والعربيه اللي فيها بنتي ولعت الن-ار خرجت من تحت رجليها ومسكت في الشوز بتاعها البنت طبعا اعدت تصرخ وتدوس فرامل العربيه مش راضيه تقف و الن-ار ماسكه بالشوز بعد كده افتكرت ان فيه مفتاح بيقفل العربيه وقفت العربيه والحمدلله الشوز هو اللي اتح-رق بس .. بعدها لقينا لوحة الكهرباء بدأت تطلع شرار كل ده وولادي جوه انا قولت خلاص المكان هين-فجر بأولادي.. الولاد اللي هناك جابوا طفاية الحريق وطفوها بسرعة".
وقالت ،"بنتي طبعا الدخان كله بتاع العربيه جه في صدرها تخيلوا لو البنت موقفتش العربيه كان ايه اللي حصل او لو بنتي كان لابسه حاجه مفتوحه وكنا في الصيف كانت رجليها اتح-رقت او لو كانت سايبه شعرها كانت الن-ار مسكت فيه انا في رحمة كبيره من الرحمن الرحيم ربنا حماها ورعاها حرفيا انا لو اعدت عمري كله اشكر ربنا انه نجا بنتي ومخلنيش اشوف فيها حاجه وحشه مش هيكفي ويارب يارب يارب محدش يشوف اللي انا شوفته في اليوم ده انا كنت هفقد النطق وهما جوه من كتر الخوف والرعب ".
واستطردت السيدة صاحبة مشكلة زيد بارك،"بنتي دلوقتي حالتها النفسيه مدمره حرفيا شافت رعب وخوف بنتي خايفه من كل الالعاب اللي في الدنيا تخيلوا مكان بالغباء والتسيب ده بدل ما يحافظ علي سلامه ولادنا ويوفر لهم الامن اداهم رعب وخوف وقلق طول عمرهم طبعا انا عملت محضر في القسم واثبات حاله اتمني ان ميبقاش حد فوق القانون"
وناشدت النيابة العامة المصرية الاهتمام للحفاظ على سلامة الاطفال وضرورة وجود معايير أمان لكل مكان دون رقيب عليه.
