الفنان محمد عبد الحليم لـ"مصر تايمز": أنا مش بشحت وكنت قاعد بشم هوا قدام البيت.. والبنت طلبت تتصور معايا ووافقت وبعدين فوجئت بكلام غلط عني (فيديو)

أبدى الفنان محمد عبد الحليم ، انزعاجه مما نشر عنه على وسائل التواصل الإجتماعى بعد صورة نشرتها إحدى الفتيات وعلقت عليها بإنه يحتاج لعمل ، وهو ما نفاه الفنان مؤكدا أن هذا الكلام عار من الصحة وأن لديه أعمال يشارك فيها .

وقال فى تصريحات خاصة لـ"مصر تايمز" " البنت طلبت تتصور معايا وقولتلها ماشى وبعدين فوجئت بالكلام اللى مكتوب ده ..وانا مش بدور على شغل ولا حاجة واستغربت جدا من بوست زى ده ..انا النقابة بتتواصل معايا وكل الفنانين أصدقائى ونبيل الحلفاوى صديقى والفنان اشرف زكى بيتواصل معايا..دول بهدلونى على الفيس بوك وقالوا عنى كلام مش صح"

وقال انه يعيش بمفرده فى منزله وأصدقائه الفنانين دائمى التواصل معه والسؤال عنه".

وأكد إنه شعر بالحزن مما نشر عنه على مواقع التواصل الإجتماعى مؤكدا أن الفنان أشرف زكى نقيب الممثلين يتواصل معه والفنان منير مكرم عضو النقابة يتواصل معه أيضا ويسأل عنه بإستمرار.

ومن جانبه قال تامر نجل الفنان محمد عبد الحليم فى تصريحات لـ" مصر تايمز":" بابا كان بيشم هواء قدام بيته مش قاعد بيشحت زي ما الناس كاتبه و كل اللى عايزه شغل مش محتاجين أي مساعدات ولا أي حاجه من حد عشان الكلام ده ضايقنا جدا وبابا حالته الصحية تعبت بسبب الكلام ده".

وعبر تامر عن انزعاجه من المنشور المتداول لوالده قائلا" انزعجنا من كلام البنت اللى نزل فى المنشور ..أبويا عايش بمعاشه وزى الفل وكمان فى بوستات سببت حالة نفسية سيئة لوالدى اللى مكتوب فيها ارحموا عزيز قوم ذل".

وكان منشور قد تم تداوله على مواقع التواصل الإجتماعى لفتاة إلتقطت صورة مع الفنان أثناء جلوسه عند نفق الملك الصالح مطالبه بمساعدته فى توفير عمل له.