ضحايا مستريحة شبرا الخيمه يروون تفاصيل النصب عليهم: "اخدت مننا 10 مليون جنيه وخلعت"
في حلقة دائرية واسعة، بشبرا الخيمة بالقليوبية، يجلس عشرات السيدات وتظهر على وجوههن علامات الحزن والبكاء، بعدما تعرضوا للنصب على يد مستريحة شبرا الخيمة، في مبلغ بلغت اجماليته 10 مليون جنيه، بزعم توظيفها في تجارة الأجهزة الكهربائية والملابس.
وأتقنت مستريحة "الأجهزة الكهربائية" دورها من البداية، حيث تقمصت شخصية السيدة الصالحة، التي تسعي في الأعمال الخيرية ودعم اليتامي، حتي تنال من ثقة الجميع، وتستطيع تنفيذ خطتها المكارة، والاستيلاء على أكبر قدر ممكن من المبالغ المالية.
والتقي "مصر تايمز" بضحايا مستريحة الأجهزة الكهربائية، واللاتي كان أغلبهن من السيدات، حيث تعاملها الدائم معهن، وقالت "عواطف صبري": "الست دي ساكنة في المنطقة عندنا اسمها "مها الخولي" كانت بتجيب اجهزة كهربية وملابس، عملنا جمعية معاها، اقترحت علينا نشارك بفلوس اكتر قولنا ماشي، اخدت أكبر مبلغ مني 650 الف و40 جرام ذهب، بيعت ارضي وآمنت ليها ودفعنا ليها مبالغ كبيرة، وأخدت ضدها أحكام".
ومن جانب آخر استكملت "حنان" ضحية الأمان والثقة لجارتها، قائلة "جيراني ومحل ثقة من زمان نعرفها، كانت توزع في رمضان وجبات وسيرتها كويسة، فضلت تقولي أعملي جمعيات وشيلي فلوسك معايا بدل ما جوزك ياخدها، دي فلوس جهاز بنتي، دلوقتي معرفتش اجوز بنتي حسبي الله ونعم الوكيل".
وأتفقن السيدات على حسن خلق المستريحة، والذي كان الدافع الأكبر وراء تسليمها أموالهن بقلب مطمئن، وجمعهن ترددهن على منزلها للسؤال عليها، فتقول أحد الضحايا "احنا 66 سيدة، أغلبنا منعرفش بعض اتعرفنا على باب بيتها وأحنا بندور عليها، خربت بيوتنا كلنا".
وأضافت "صباح سالم": " أخدت مني 80 الف على مرتين، 40 على اساس الشغل 40 سلف، بتجيب جهاز عرايس وقالتلي يطلع ليكي نسبة منها عن طريق محل في بيتها، عملنا محضر ضدها وفي حكم، ومفيش حد لقيها، وبناشد الرئيس وأقوله الفلوس دي بتوع عيلة غلبانة من ذوي الاحتياجات الخاصة".
وتستكمل السيدات شكواهن ضد السيدة التي خانت عشرة سنوات طوال بينهن، فتبث أحد الضحايا شكواها عبر مصر تايمز قائلة " الست دي اخدت مني 5000 وبعدين الحت عليا واخدت 55 الف تاني، ماخدتش منها فوايد، قالتلي عشان تحل مشكلة مع جوزها، اتصرفنا فيها وقولنا ليها احنا مستلفين الفلوس عشان ترجعها".
وأشارت "ناهد فواز" إلى أن للسيدة لم تكتفِ بما سبق، بل اقنعتها بالاستلاف من والدتها بأخذ الأموال حيث أنها قامت بدفع 35 الف ومن والدتها 40 الف، ومعًا في حالة المكسب والخسارة، وقالت " كانت عاوزة تاخد من اخويا، أنا جوزي اتحبس بسببها عشان اخدت من اخته فلوس برضو، وقعتنا في بعض وبستغيث بالرئيس السيسي".
وبملابس سوداء قاتمة وعيون تتساقط منها الدموع، أختتمت الضحية الأخيرة حديثها لمصر تايمز وهي تبث شكواها، قائلة "انا ارملة ومعايا 5 أيتام، قالتلي بيعي شقة ابوكي ب130 الف، جوزها كتب ليا وصولات امانة، وأخدت حكم ضده، حسبي الله ونعم الوكيل".
