حازم إمام يرد على هجوم مرتضى منصور: "هتموت وتكره الناس فيا"

رد حازم إمام عضو مجلس إدارة اتحاد الكرة المصري، على تصريحات مرتضى منصور رئيس نادي الزمالك، بشأن أزمة قيد الصفقات الجديدة في قائمة الفريق الأبيض.

حازم إمام يرد على هجوم مرتضى منصور: "هتموت وتكره الناس فيا"

وكان مرتضى منصور قد اتهم حازم إمام في تصريحات تليفزيونية، بأنه حاول تعطيل قيد الصفقات الجديدة في قائمة نادي الزمالك، قبل غلق باب القيد في انتقالات الشتاء.

وكتب حازم إمام عبر حسابه الرسمي على "فيسبوك"، اليوم الأربعاء: "طبعا كل اللي اتقال ده أي كلام وكذب كالعادة، والله العظيم ولا حد كلمني عن أي حاجة بخصوص الزمالك"، مضيفاً، "نفسي أعرف إيه كمية الغل والافتراء اللي عندك، هتموت وتكره الناس فيا، بتتبلى على الواحد وحاشر أسمي في أي حاجة، نفسي مرة تقول إنك غلطت، مش لازم تشيل الناس غلطاتك، حسبي الله ونعم الوكيل".

مرتضى منصور يفتح النار على اتحاد الكرة بعد رفض قيد صفقات الزمالك
 

وشن مرتضى منصور، رئيس نادي الزمالك، هجوماً عنيفاً على جمال علام رئيس اتحاد الكرة، وحازم إمام، نجم الزمالك الأسبق، وعضو مجلس إدارة الاتحاد المصري لكرة القدم.

وقال مرتضى منصور في تصريحات تلفزيونية، "حازم إمام، رفض الحصول على شيكات الزمالك، وأصر على الحصول على المبلغ كاش، صفي يا حازم، حسابتك بعيدًا عن جماهير الزمالك، إللي عملته جريمة في حق جماهير الزمالك مش في حقي أنا.. أنا اللي سافرتك للاحتراف في أودينيزي وأنا اللي رجعتك لما فشلت".

وأضاف مرتضى منصور، "مشكلة الزمالك مع اتحاد الكرة ليست مالية وإنما نفسية (الأقزام عندما يتعاملون مع العمالقة، سنقوم بعمل محضر اثبات حالة ضد جمال علام واتحاد الكرة، بسبب رفضهم الحصول على شيكات الزمالك".
 

وتابع مرتضى منصور، "اتحاد الكرة رفض شيكات نادي الزمالك، أنا تنازلت عن 9 ملايين جنيه، الذين سيأتون من الاتحاد الدولي، لمشاركة سيف الجزيزي مع منتخب تونس في كأس العالم، طلبت من الشركة الراعية، إرسال 10 ملايين جنيه لاتحاد الكرة، ليكون بذلك 19 مليون جنيه، ولكن اتحاد الكرة رفض الشيكات".

واصل مرتضى منصور تصريحاته قائلاً: "أنا بطمن جماهير الزمالك، سجلنا اللاعبين على السيستم في الحادية عشر ونصف مساءً، وزير الشباب والرياضة تحدث مع جمال علام، لقيد الصفقات ولكنه رفض، هو مين جمال علام! اتحاد الكرة هيتحل".
 

واستكمل مرتضى منصور تصريحاته قائلاً، "جمال علام وحازم إمام داخلين خناقة مع 50 مليون مش معايا أنا .. أنتوا قد غضبة جماهير الزمالك؟ جمال علام مش هيبقى موجود في البلد كلها، مين جمال علام؟ يا محمد بيه يا اللي جبتهم ؟ أنا خايف على ثورة الجماهير عليهم .. وزير الشباب كلمه وناس كتير كلموه قالهم هو وحازم إمام لأ .. ده اتحاد كورة؟ وزير الشباب قالهم هبعتلكم فلوس من عندي .. أنا هحل الاتحاد بتاعه".
 

واختتم مرتضى منصور تصريحاته قائلاً، "حازم إمام، بيعمل معايا كده عشان قولتله (لو راجل انزل انتخابات الزمالك قصادي)، أنا زهقت وعلى وشك أقول أنا ماشي.. أنا محروق دمي، بسبب أمور قانونية، الموضوع زاد عن حده".