"عمرنا ماهننساك".. أشرف عبد الباقي يحيي ذكرى وفاة علاء ولي الدين
حرص الفنان أشرف عبد الباقي على إحياء ذكرى صديقه الفنان الراحل علاء ولي الدين، الذي ترك بصمة في تاريخ الكوميديا في السينما العربية، ويظل حتى الأن في قلوب محبيه .
"عمرنا ماهننساك".. أشرف عبد الباقي يحيي ذكرى وفاة علاء ولي الدين
كتب أشرف عبد الباقي عبر صفحته على موقع التواصل الإجتماعي “الفيسبوك” قائلا: “ربنا يرحمك ياعلاء زي النهاردة من عشرين سنة اتوفي علاء ربنا يرحمه ويغفرله يارب وبرغم ان فات عشرين سنة علي وفاته لكنه كان ومازال اقرب صديق ليا”.
تابع:“اول مرة اطلع عمرة كان معاه واحنا رايحين الكعبة قاللي بص في الارض لغاية مانوصل والكعبة تبقي باينة واقوللك بص وادعي ويمكن الحكاية دي بقيت اعملها مع اي حد يعمل عمرة لأول مرة وادعي لعلاء” .
وواصل أشرف عبد الباقي: "في حياته كنت بشوف الخير اللي بيعمله مع ناس كتير واتعلم منه بشكل مباشر وغير مباشرعلاقتنا كانت اكتر من اخوات ومن خلاله كنت بشوف باقي اصحابنا لانه كان كريم جدا ومضياف جدا وفي بيته كنت بحس اني في بيتي وان والدته الله يرحمها زي والدتي اللي اتوفت وانا في سن صغير وخالد اخوه الله يرحمه ومعتز ربنا يكرمه ويخليه لاولاده زي اخواتي وقت ماكنت احس اني متضايق اروحله اتكلم معاه وارتاح ".
أضاف: “ماكانش يعدي يوم الا لما نتقابل اونتكلم في التليفون نعرف اخبار بعض وصادف ان يوم وفاته كان اول يوم عيد الاضحى وبعد ماوقف علي الاضحية اتوفي وكنا علي ميعاد يومها في المسرح لعرض مسرحية لما بابا ينام اللي انتهت بوفاته”.
واختتم أشرف عبد الباقي كلامه “ربنا يرحمك ياعلاء ويصبر اهلك واصحابك اللي اكيد مادام عرفوك عمرهم ماهينسوك”.
