عمرو وهبة يشجع متابعيه لمساعدة المحتاجين: "وفر من رفاهياتك عشان غيرك يجيب أساسياته"
شجع الفنان عمرو وهبة، للتبرع لصالح الأعمال الخيرية، لمساعدة الأخرين لتوفير إحتياجاتهم الأساسية، وذلك عبر حسابه الشخصي بموقع التواصل الاجتماعي "فيسبوك".
عمرو وهبة يشجع متابعيه لمساعدة المحتاجين: "وفر من رفاهياتك عشان غيرك يجيب أساسياته"
قائلا:" بوست جد على غير العادة.. بصرف النظر عن الكومنتات اللى هتقول يا عم أنت فنان وأنت بتاخد ملايين وأنت مالك بالكلام ده وكل الحاجات اللى مش صح دى بس هقول برده".
وتابع:" مؤخرًا بسبب ظروف معظم الناس بمختلف طبقاتهم واحتياجتهم وأنا منهم بدأ كل واحد فينا يفكر إزاى يوفر وإزاى يستغنى عن المصاريف اللى ممكن يستغنى عنها بس أنا اكتشفت أن أنا الشيطان بقى بيخلينى استنصح مش أوفر".
وأضاف:" يعنى بصرف عادى مصاريفي اليومية اللي مش كلها الصراحة أساسية أو ليها بديل بس بوفر في الـ5 جنيه اللي بدفعها للي بيحطلي بنزين أو بقلل التيبس اللي بسيبه في مطعم كلت فيه برقم مش شوية، ومن نوعية المصاريف دي".
وواصل عمرو وهبة كلامه: "مع إني بكره السنتحة والفلوس الإتاوة اللي ملهاش لزمة دي وبتعصب من اللي بيرمي نفسه على بريريز العربية عشان يليطها بفوطته اللي مداقتش طعم المية في حياتها، وبقول دول ناس مش بيعملوا حاجة وارد جدًا أكون بفكر غلط، قولت ياعم سيبهم بمزاجك وخد أنت الثواب يعني، وهو ممكن يكون بالنسبالك بيستليح بس في الآخر الأكيد أن هو محتاج الفلوس دي".
أوضح: "ولما بسمع حد بيقولي يا عم الناس دي بيعملوا فلوس قد كده بسخن ومش بديهم وبعدين بفكر كده بيعملوا كام يعني؟ الفين جنيه في الشهر تلات آلاف، خمس آلاف، عشر آلاف، حتى أكتر من كده؟ ما هو مش بياخدهم منك ويطلع يعمل كايت سيرفينج في رأس سدر، ما هو هيجيب بيهم أكل وشرب وبرده مهما زاد ده بقى رقم عادي، والقرشين اللي هتدفعهم دول أكيد مش هيفرقوا معاك بس وارد يفرقوا معاه أو مع اللي بيصرف عليهم".
ونصح "وهبة" متابعيه قائلا:"حد هيقولى طبعًا خلاص ياسيدى انت كده بتشجع على الاستلاياح وروح ادفعهم لمستشفى ولا لدار ولا لاى حد مريض او اى حاجه كده هقوله معاك بس انا كـ عمرو ومش بقول انه اى حد يعمل كده انا بقيت يومياً بصحى الصبح افتح ابلكيشن فورى اختار اى جهه تبرعات واحط اى رقم اتبرع بيه حتى لو عشره ولا عشرين جنيه وثبتها كا شئ اساسى فى بدايه يومى لحد ماخلاص بقت حاجه مش بنساها الحمدلله خالص وعامه يعنى انا نصحت بيها كام حد حواليا وكلمهم كلمونى وقالولى دى سحر والله احنا عملنا كده وربنا فتحلنا فى كذا وكذا".
واختتم عمرو وهبة:" مش شرط طبعًا يحصلك زيهم بس وارد جداً ربنا بسببها يمنع عنك حاجه وحشه كانت هتحصل وانت متعرفش، الخلاصة وفر شويه من رفاهياتك عشان غيرك يعرف يجيب شويه من اساسياتة وشكراً".
