ميدو: الزمالك يتعرض لمؤامرة من أبناء النادي.. واتعلموا شوية من الأهلي

أكد أحمد حسام ميدو، المدير الفني السابق للفريق الكروي الأول بنادي الإسماعيلي، أن نادي الزمالك يتعرض في الوقت الحالي لمؤامرة منظمة من جانب المنتمين للقلعة البيضاء، مطالباً رموز وأبناء الزمالك بنبذ الخلافات في ظل الأوضاع الصعبة التي يمر بها النادي حالياً.

ميدو: الزمالك بيتعرض لمؤامرة من أبناء النادي.. واتعلموا شوية من الأهلي

وقال ميدو في تصريحات تلفزيونية، "اتعلموا من أبناء النادي الأهلي، وقت الأزمات، يتحدوا من أجل ناديهم، وطول ما الزمالك في ناس عايزين ياخدوا الكرسي على حساب الكيان والنادي، هيفضل الزمالك زي ما هو، مش عشان النادي أقل من حد، لكن عشان فيه بعض المبادئ تاهت"

وأضاف ميدو تعليقاً على تسريب عقود ثنائي الفريق الكروي الأول بنادي الزمالك، مصطفى شلبي ونبيل دونجا، "اللاعيبة اللي اتسربت عقودهم في الزمالك، متنقيين بالاسم، وموضوع تسريب عقود اللاعيبة يهد أي فريق، واللاعيبة دي محتاجة الدعم، وزيدان أول 6 شهور في يوفنتوس كانوا عايزين يمشوه ومش بقارن، لكن بوضح إن أي لاعب محتاج فترة انسجام".

وتابع ميدو، "لما عقود لاعيبة الزمالك تتسرب في التوقيت ده، تعرف إن في مؤامرة مُنظمة من أجل إخلال التوازن بنادي الزمالك، تسريب عقود لاعيبة الزمالك، وأبصملكم بالعشرة، جاي من ناس تنتمي لنادي الزمالك، وعمري ما دخلت انتخابات نادي الزمالك ولا هدخلها، لكن أنا هحارب أي بني آدم هيستغل مشهد معين للعودة إلى الأضواء مرة أخرى على حساب نادي الزمالك".

واصل ميدو تصريحاته قائلاً، "أزمة تسريب عقود لاعبي الزمالك كشفت الكثير من الأشخاص على حقيقتهم، يا ولاد الزمالك اتعلموا شوية من النادي الأهلي، الزمالك بيتعرض لأزمة كبيرة، ولازم نقف مع بعض  لحد النادي ما يوصل لبر الأمان، وبعد كده اعمل اللي انت عايزه في لعبة الانتخابات".

واختتم ميدو تصريحاته قائلاً، "اللي صغير بره الزمالك بيفضل صغير، وموضوع تسريب عقود لاعيبة الزمالك كشف ناس كتير، ومش هنسمح إن حد يهد نادي الزمالك، خاصة لمن ينتمون إليه".