"ضيعوا من عمري 3 سنين".. شاب يستغيث بعد تجاهل محافظ الشرقية وجامعة الأزهر طلبه بالنقل لظروفه الصحية
استغاث شاب بعد تجاهل جامعة الأزهر ومحافظ الشرقية طلبه بالنقل لكلية قريبة من بلدته بسبب ظروفه الصحية وضياع 3 سنوات من عمره ، على حد قوله.
وقال صاحب الواقعة،" في 2020 تنسيقي دخلني شريعة و قانون طنطا وانا من الزقازيق فتقدمت بطلب لنقلي لنفس التخصص قريب مني في بلدي بسبب ظروفي الصحية وإني مش هقدر احضر ومحدش رد عليا لمدة سنة كاملة وقالولي لازم تحضر الامتحانات بأي طريقة عشان يوافقوا على نقلك السنة الجاية لان النقل واقف السنة دي و حضرت الامتحانات وطبعا لما روحت الكام يوم امتحان فضلت شهور بتعالج من ألام ضهري لأن وقتها مكنش عندي الكرسي ده وسقطت السنة لأني محضرتش محاضرة واحدة واللي في الكتب والملخصات غير المحاضرات طبعا استعوضت ربنا وقولت السنة الجاية اكون نقلت وأعوضها وحصل نفس الموضوع جامعة الازهر في القاهرة و كلية شريعة وقانون طنطا و إدارة الازهر التعليمية في الزقازيق كل دول محدش كان بيرد على طلباتي ولا بورق ولا ايميلات ولا فاكسات ولا أي حاجة وسقطت للمرة التانية بسبب ان مفيش رد !.
وتابع الشاب،" لما جبت الكرسي دع وقدرت اروح اسأل تاني قالولي خلاص كده انت ليك كلية مستنفذين تجارة ازهر القاهرة ورجعنا لنفس النقطة مش عارف احضر وهيدخلوني كلية غير روحت وقابلت محافظ الشرقية مرتين عشان يكلمهم في الازهر يردوا عليا وقالي كلمتهم وقدمتلك طلب روح بورقك هناك عشان يتابعوا معاك روحت فضلت من 9 للساعة 5 مستني عشان اقابل نائب رئيس جامعة الازهر انتقم ربي منه والاخر طلع ان المحافظ مقدمش طلب اصلا ولا اي حاجة وقدمت انا التماس وطمني ان كله هيكون تمام وخد رقمي وقالي بكره هنتصل عليك ونبلغك بنتيجة الالتماس ومش محتاج تيجي تاني وطبعا محدش كلمني شهور وانا مستني ولما روحتلهم من اسبوعين اقولهم لحد دلوقتي محدش رد عليا والسنة بتضيع وانتو مابتردوش على تيليفونات قالي الالتماس اتقبل وينفع تخش جامعة مستنفذين .. ايه؟ امال انا كنت جاي لية ومستني ده كله لية؟ قالي هو الطلب متقدم كده".
واستطرد،" المهم بعد جدال كتير ومش راضيين اني اقابل النائب تاني ومماطلة وتعالي كمان يومين ولما وصلت الموضوع لرئيس جامعة الازهر حسبي الله ونعم الوكيل فيه قالي هعيد النظر في الاوراق ونكلمك خلال اسبوع ومديرة مكتب نائب جامعة الازهر فضلت اكتر من مرة تقولي امشي ومتقلقش هنكلمك تاني..محدش كلمني ولا حد هيكلمني و 3 سنين ضاعوا من حياتي وانا بحاول بسبب المماطلة وأهملهم ولا انا عرفت اخرج من الازهر ولا عرفت اكمل في اي تخصص تاني او جامعة تانية ولما حاولت ارفع قضية قالولي مش هتقدر لازم محامي اللي يرفعها وحلني لو كسبتها بختصار بلدي بتحميهم وبتساعدهم يخالفوا القانون ويصنعوا جيل ضايع فقد الشغف في حياته".
