عمرو أديب يعلق على خسارة الزمالك ضد البنك الأهلي: النادي بقى خرابة

أبدى الإعلامي عمرو أديب غضبه الشديد من تراجع نتائج الفريق الكروي الأول بنادي الزمالك موضحاً أن الزمالك تعرض للهزيمة في 10 مباريات منذ بداية عام 2023.

عمرو أديب يعلق على خسارة الزمالك ضد البنك الأهلي: النادي بقى خرابة

وتعرض الزمالك لهزيمة قاسية أمام البنك الأهلي بثلاثية نظيفة، في المباراة التي جمعتهما أول أمس الأحد بملعب "المقاولون العرب"، ليودع منافسات بطولة كأس الرابطة من دور الـ 16.

قال عمرو أديب في تصريحات عبر برنامجه "الحكاية"،  "مبنتكلمش عن فرقة إحنا بنتكلم على خرابة، واللي مش مصدقتي يبص للهدف الثاني، يوري لك حالة فرقة نادي الزمالك (الخرابة)، البنك الأهلي سجل 3 أهداف في 7 دقائق رقم قياسي عالمي غريب، والموضوع مش غريب لأن اللاعبين كل يوم بيلاقوا مدرب جديد".

وتابع عمرو أديب الزمالك النادي الثاني الأكثر شعبية في مصر والعالم العربي ونادي البطولات لا يمتلك مدربًا، معقولة ده يتعمل في الزمالك؟ هل يمكن يكون في نادي حياته تبقى عاملة كده؟ أنت عندك التاريخ كله وأحسن لاعبين والإمكانيات والجمهور، ليه الزمالك بيتعمل فيه كده؟ إحنا كنا بنتهان في ماتش البنك الأهلي والهزيمة مهينة".
 

وشدد  عمرو أديب على أهمية إنقاذ الزمالك، قائلاً "عاوز أعرف الدولة بتتفرج ليه؟ الدولة بتكتب على سطر وتسيب سطر، النادي ده بتاع الدولة والفلوس اللي بتضيع دي فلوس الناس".

وأضاف عمرو أديب : "كل يوم فريق الزمالك بينزل التدريب مش عارف مين مدربه.. النهاردة عبد المقصود وبكرة عبد المعبود، متسائلًا: معقول تاني أكبر فريق في مصر مش عارف له مدرب؟.. ده شيء مهين وبايخ وشكله وحش، ليه بيتعمل فينا كده".

وتابع عمرو أديب : "فيه طفل صغير نزل الملعب إمبارح والجماهير قالت مش بعيد يجيب الجول الرابع في عواد، اعملوا اللي أنتوا عايزينه في الزمالك بس المشهد ده ميتكررش، حرام اللي بيتعمل في النادي ومقدرش أحمل اللاعيبة مسؤولية الهزيمة، فيه ناس داخل نادي الزمالك مبسوطين بالهزيمة.. فيه مؤامرة في قلب النادي".

واستنكر عمرو أديب موقف الدكتور أشرف صبحي وزير الشباب والرياضة وعدم وضوحه، متابعاً: "بيقول مش عاوزين نضايق حد ونعمل حاجة تطلع غلط بعد كده، طب هتعرف إمتى؟ طب يا جماعة كلكم مش عندكم رأي، طب الرأي عند مين؟ النادي عمره ما كان كده حتى في أسوأ ظروفنا".

واختتم عمرو أديب حديثه: "بيعوا النادي وأعملوا مكانه مطاعم وحمامات، هو الزمالك بيحكمه قانون ولا ملاهي ومراجيح؟، طبقوا أي قانون على الزمالك حتى لو قانون المرور بدل الفوضى، أو سيبوه يقع ويبقى خرابة وربنا يتولاه برحمته".