"حط السكينة فى ضهرها".. أطباء القصر العيني ينقذون سيدة طعنها زوجها فى خناقة بينهم

أقدم زوج على طعن زوجته فى ظهرها بسكين المطبخ بعدما امتدت الخناقة بينهم على مصاريف البيت ، مما نتج عنها إصابتها الخطيرة.

وقال متداول الواقعة على الفيس بوك،" المكان : حوادث القصر العيني الزمان: قبل الفطار بكام ساعة كدا

خناقة بسيطة بين اي زوجين مصريين عادي على فلوس هدوم العيد ( اللي لسا بعد 19 يوم) ... كلمة منه على كلمة منها الراجل فقد اعصابه و بدل ما يطلقها او يشتمها و هو صايم في نهار رمضان قام ضربها بسكينة المطبخ في ضهرها..اه و الله في رمضان".

وتابع عن الواقعة ،" في ساعات قليلة.... 5 فرق جراحية من جراحة المخ و الأعصاب و جراحة الأوعية الدموية و المسالك و الجراحة العامة و التخدير بتعاين المريضة و تعمل اشعات مقطعية.... حجز كام كيس دم ع بلازما و اتخاذ قرار بإزالة السكينة من ضهر العيانة بواسطة فريق جراحة الأعصاب..الساعة ٦:٠٥ المغرب..المريضة على ترابيزة العمليات في تأهب شديد لا قدر الله السكينة ممكن تكون داخلة في احد الشرايين المهمة او الامعاء او الحبل الشوكي".

وقال " و لان ربنا لطيف بعباده.... السكينة تكون خابطة في الفقرات من برا و تحول مسارها بعيدا عن الحبل الشوكي و الشرايين المهمة و تعدي على خير الحمد لله. .طبعا الحمدلله محدش من الناس اندفع وشال السكينة والا كانت قطعت احد الشرايين الكبيرة وكانت المريضة ماتت فورا من شدة النزيف صعب تلاقي كل الفرق الطبية دى غير فى القصر العينى ..الوقت احنا فيه صعب جدا جدا كل زوج وكل زوجه تعايش مع الازمه وان شاء الله تعدى على خير نستحمل بعض".