كنا هنموت مرتين.. سيدة تحذر من شراء منتجات شركة فريش
حذرت سيدة من شراء منتجات شركة فريش ، بعد تعرضها للموت هى وعائلتها لسقوط السخان فجأة ، وتسببه فى دمار منزلها، على حد قولها.
وقالت صاحبة الشكوي عن شركة فريش،" من خلال تجربة شهر واحد بس أنا حابه احذر الناس من التعامل مع شركة فريش ،في خلال شهر كنا هنموت مرتين بسبب أخطاء مميته من الشركة والعاملين فيها ..أنا اشتريت من الشركة سخان فريش 50لتر وفرن بلت أن وبوتجاز بلت أن وشفاط وطلبت الشركة عشان تبعت فني يركب الأجهزة ويفعلي الضمان وكل شي يبقي سليم لاني مش بحب اخاطر مع اي حاجة فيها كهرباء في اعتقادي أن الشركة كبيرة وبتشغل ناس موثوقة ومدربة قبل اسبوع تقريبا من جوازي 22/2/2023وانا اتجوزت يوم 4/3/2023 طلبت الشركة وجيه فني ركب الأجهزة وكانت الفرن والبوتجاز والسخان ، اول يوم دخلت فيه الشقة جوزي شم ريحة غاز مالية الشقة افتكر أن الأنبوبة هي السبب قفلها وخلاص تاني يوم بيبص علي الأنبوبة يشيك عليها لاقي أن الخرطوم مش مربوط اصلا كويس في الانبوبة شبه سايب يتفك بالايد طبعا انهارت اعصابي لاننا كان ممكن منخدش بالنا ونشغل البوتجاز ساعتها كانت الشقة هتنفجر بينا وكان هيتقال قضاء وقدر والشركة مش هتتحمل اي مسئولية اتصلنا بالشركة وصورنا وقتها فيديو وبعتناه للشركة وكانت غلطة كارثية ومميته مش حاجة بسيطة وبعد خناقة مع الشركة كبيرة بعتو فني تاني وعديت الموضوع وقتها وقلت خلاص مش هناخد اي اجراء قانوني والحمدلله ربنا ستر وكان رحيم بينا".
وتابعت عن شكوتها عن شركة فريش،" نفوجئ يوم 4/4/2023 بليل قاعدين فجأة نسمع صوت كأن قنبلة عمارة بتقع صوت رهيب في الشقة قمنا فتحنا كل أبواب الشقة نؤجئ أن السخان وقع من الحامل كأن الحامل بتاع الشركة معمول من ورق مش معدن مش قادر يتحمل حمولة السخان وقع دمرلي الحمام وغسالة ثمنها 18الف ورخامة وطبعا السخان أدمر من الوقعة الفكرة أن الحمدلله محدش كان في الحمام وقتها قبلها بأقل من خمس دقائق جوزي كان جوه بيغسل أيده والسخان متركب فوق الحوض يعني تاني غلطة مميته في التركيب من شركة فريش ، أنا كنت واقفة اصوت من المنظر وجوزي يهدي فيا من الخضه لانه كان قبلها لسه جوه كان اكيد لو وقت وقت ما كان موجود كان هيموت بعد الشر ربنا لطف ورحمنا تاني مرة لكن لتاني مرة الشركة دي بتستهر بأروحنا يعني بدل ما انتوا بتعملوا اعلانات وتصرفوا فلوس كتير كنتوا استغلتوها ودربتوا اللي شغالين معاكوا أنهم يعرفوا يقوموا بشغلهم وتحسنوا خامات اللي بتستخدموها سخان متركب من بقاله شهر يقع ازاي بالشكل ده من مكانه ازاي واحد يجي يركب بوتاجاز وفرن حاجات ليها علاقة بالنار والغاز ويكون بالاهمال ده ازاي اروحنا رخيصة اوي عندكوا كدة المبيعات نمرة واحد عندكوا علي حساب اروحنا ونكلم الشركة يتعاملوا ببرود كأن الموضوع خلاط واتكسر مش غلطتين كل واحدة مميته بس لينا عمر عشان المرة دي مش هسكت واسيب حقنا زي اول مرة في شهر واحد كنا هنموت بسببكوا مرتين حسبي الله ونعمه الوكيل فيكوا لانكوا شركة معندهاش ضمير ولا بتشغلوا ناس عندها ضمير اهم حاجة المكسب وبس علي حسابنا وحساب حياتنا".
وتابعت عن شكوتها عن شركة فريش،" احنا هنمشي في أي اجراء قانوني يجيب حقنا وكل حاجة متوثقة من اول مرة حصلت الغاز للسخان أنا حبيت احذر اي حد من التعامل معاهم لغاية لما يعرفوا أنهم بيتعاملوا مع بني ادمين مش فلوس بس مش بس كدة ده بيحملونا غلط أنه وقع علي اساس احنا اطفال كل شوية هنجيب سلم ونقعد نلعب في السخان ووقع واحنا بنلعب يعني حتي مش راضين يعترفوا بأن الخامات بتاعتهم رديئة أنا مرضتش اقول حاجة غير بعد ما اشوف ردهم علينا في المصيبة دي وكان ردهم أن اكيد مش بسبب عيب تركيب ده حد لعب في السخان حتي مش فكروا يجوا يعاينوا ووقتها هيعرفوا أن الغلط من خامتهم لكن رد مستهتر من شركة مستهترة بالعملاء وأرواحهم في قانون في بلدنا وان شاء الله حقنا مش هنسيبوا".
