نجاة أسرة من الموت بعد انفجار بوتاجاز فريش.. والشركة ترد: خطأ فني
نجت أسرة من الموت بعد انفجار بوتجاز الخاص بها بعد إصلاحه من فني شركة فريش ، وقالت صاحبة الواقعة ،" كان عندي بوتجاز هامر من FRESH فريش و ولع نتيجة خطأ من الفني اللي جه صلحه من فترة
الفرن انفجر بسببهم و البوتجاز ولع و طلع نار و قعدنا نطفي فيه كتير جدا و النار كانت طالعه من ورا و من قدام و بهدل المطبخ من النار و زجاج الظهر و الفرن انفجر و طار في كل حتة ".
وتابعت عن بوتاجاز فريش،" دمر الشقة من الدخان و الريحة و الدخان كان في كل حته و كان ممكن يخنقنا لو كنا اتأخرنا ثواني بس!!!!!كمان حرق الشفاط اللي فوقه من النار و فيش الكهربا اللي فوق البوتجاز و كان ممكن يموتنا و يحرق الشقة كلها!!!!! دا يرضي مين بجدد المهم كلمنا فريش و بعته مهندس و قال ان دا حصل بسبب الخطأ بتاع الفني اللي جه صلحه من فترة و بقالنا 3 ايام بنتواصل معاهم و هما عارفين ان الغلط منهم لان مفيش حاجة ممكن تخللي البوتجاز ينفجر و يولع كدا و دا كلامهم كمان".
وقالت عن مشكلتها مع شركة فريش ،" مع العلم ان البوتجاز في الضمان و الغلط من عندهم و هما بيماطلوا و مش عايزين يدفعوا اي تعويض و الحل اللي عندهم اننا ندفع ٥ الاف جنيه و يخدوه يصلحوه و قالولنا ممكن تكلفة التصليح تزيد كمان!!! يعني احنا كنا جايبين اغلي بوتجاز من عندهم بميزة الامان و انه امن و مش بيسرب غاز علشان يولع بعد 4 سنين و هو في الضمان؟؟؟؟ و كمان هما مش هيعوضونا!!!بصراحة فريش اسوأ شركة ممكن تشتروا منها منتجات كويسة و كمان خدمات العملاء بتاعتهم وحشيين جدا و مش بيحلوا حاجة خالص، و الفنيين بتاعهم مش بيعرفوا يصلحوا حاجة خالص بجد تجربة سيئة جدا".
وكانت سيدة قد حذرت من شراء منتجات شركة فريش ، بعد تعرضها للموت هى وعائلتها لسقوط السخان فجأة ، وتسببه فى دمار منزلها، على حد قولها.
وقالت صاحبة الشكوي عن شركة فريش،" من خلال تجربة شهر واحد بس أنا حابه احذر الناس من التعامل مع شركة فريش ،في خلال شهر كنا هنموت مرتين بسبب أخطاء مميته من الشركة والعاملين فيها ..أنا اشتريت من الشركة سخان فريش 50لتر وفرن بلت أن وبوتجاز بلت أن وشفاط وطلبت الشركة عشان تبعت فني يركب الأجهزة ويفعلي الضمان وكل شي يبقي سليم لاني مش بحب اخاطر مع اي حاجة فيها كهرباء في اعتقادي أن الشركة كبيرة وبتشغل ناس موثوقة ومدربة قبل اسبوع تقريبا من جوازي 22/2/2023وانا اتجوزت يوم 4/3/2023 طلبت الشركة وجيه فني ركب الأجهزة وكانت الفرن والبوتجاز والسخان ، اول يوم دخلت فيه الشقة جوزي شم ريحة غاز مالية الشقة افتكر أن الأنبوبة هي السبب قفلها وخلاص تاني يوم بيبص علي الأنبوبة يشيك عليها لاقي أن الخرطوم مش مربوط اصلا كويس في الانبوبة شبه سايب يتفك بالايد طبعا انهارت اعصابي لاننا كان ممكن منخدش بالنا ونشغل البوتجاز ساعتها كانت الشقة هتنفجر بينا وكان هيتقال قضاء وقدر والشركة مش هتتحمل اي مسئولية اتصلنا بالشركة وصورنا وقتها فيديو وبعتناه للشركة وكانت غلطة كارثية ومميته مش حاجة بسيطة وبعد خناقة مع الشركة كبيرة بعتو فني تاني وعديت الموضوع وقتها وقلت خلاص مش هناخد اي اجراء قانوني والحمدلله ربنا ستر وكان رحيم بينا".
