سامي الشيشيني: "كل فرق الدوري طمعانة فينا وربنا كرمنا بـ3 نقاط"

أعرب سامي الشيشيني المدير الفني للفريق الأول لنادي أسوان، عن سعادته الشديدة عقب فوز فريقه على فريق إنبي في أولى جولات الدوري العام، وقال في تصريحات عقب المباراة: "كرم من عند ربنا انى أحصد النقاط الثلاثة لسه مجمعين الفريق فى 25 يوم، وحوالى 25 لاعب، أغلبهم مكانش بيلعب مع فريقه، وكل الأندية طمعانة فينا".

وأضاف: "واشتغلنا فى حدود إمكانياتنا اشتغلنا على تضييق المساحات مع إنبى وحسم الهدف وتغلبنا على واحد من أفضل المدربين فى الدورى، وتغيير هيثم كان كرم من ربنا وأحيى اللاعبين والجهاز الفنى ومجلس الإدارة ربنا كرمنا بثلاث نقاط نبنى عليهم فى المرحلة المقبلة.

أكمل: "كان فى لاعيبة لازم تتباع عشان نقدر نكمل، لم يتبقى معنا سوى 8 لاعبين واشتغلنا عليهم وضمينا صفقات جديدة، المباراة القادمة مع الطلائع ومش هريح عندى ماتش ودى بكرة مع الانتاج، لازم تبقى مأهل كل اللاعيبة اللى عندك لأن ممكن فى ثانية تتفاجئ بإصابات كورونا أو يجيلك إجهاد، شغلى كله لازم احترم الخصم."

وأتم تصريحاته: "مباراة اليوم صفحة واتقفلت ولازم اشتغل كأنهم مش موجودين من بداية الموسم كل الفرق طمعانة فى أسوان".

وتمكن أسوان من تحقيق الفوز الأول في النسخة الجديدة من بطولة الدوري العام، وذلك على حساب نادي إنبي، بهدف نظيف أحرزه هيثم الفيل لاعب أسوان، في المباراة التى أقيمت على ستاد "بتروسبورت".