أغني بنك فى مصر وخدمة العملاء "زفت".. سيدة توثق تجربتها مع بنك Cib
هاجمت فتاة بنك CIB Bank بسبب سوء خدمة العملاء على حد قولها بعد تجربتها مع البنك وخدمة العملاء.
وقالت صاحبة مشكلة CIB Bank ،" CIB Bank دي نبذة أو قصة قصيرة حزينه عن حكايتي مع الخدمة التليفونية البنكية للبنك الأغنى في مصر والعالم تقريبا يعني مش ناقصهم فلوس أبدا... واللي بيحاول يقدم خدمة كويسة للجمهور فقام قالب 80٪ من خدماته إما أونلاين أو الخدمة التليفونية فلما عمل كده راح معين نفرين بالعدد يردوا على التليفون حضرتك كل ما تتصل عشان تنجز أي حاجة او تسأل أي سؤال أهبل.. زي ليه مثلا لما حاولت اشتري كذا أو أدفع كذا بالكارت أونلاين مدفعش... سؤال أهو شرعي جداً وحلال بس ازاي بقى لازم يطلع روح أهلك انتظار وبرسالة سخيفة (تقبل اعتذارنا أصل فيه مليون واحد دلوقتي والدنيا زحمة) والرسالة دي هتخرم ودنك في أي وقت من اليوم يعني 8 الصبح 2 ظهرا 8 المغرب ولا 12 بالليل... تخيل الناس كلها مبيحلاش لهم يكلموا البنك الا لما حضرتك تتزنق وتبقي عايز تعمل المكالمة.. طبعا مش البنك الغلطان أبدا هو عمل اللي عليه وعين نفرين يردوا بقي اخبط دماغك في حيط".
وتابعت صاحبة مشكلة ، CIB Bank ،" اشتكيت من الموضوع ده اكتر من مرة وان المكالمه بتعطل وقتي جداً وبقعد في الانتظار كتير دا غير إن المكالمه مش ببلاش حتى دا انت لازم تدفع عليها ومش من رصيد فلكسات لأ انت لازم تكون شاحن فلوس عشان الخط يشتغل من الآخر خدمة تليفون زفت جداً لبنك كبير ومش بيقبض شوية يعني طالع واخد فلوس نازل واخد فلوس.. منكم لله بجد... دنا لو عديت عالبنك أسهل لي.. إنما من فضلك يا فندم الخدمة دي عبر التليفون فقط".
وكان عدد من المواطنين قد حذروا من التعامل مع بنك CIB، موضحين أن البنك يتلاعب بأموال العملاء بشكل كبير ، وقال صاحب مشكلة مع البنك،" الموضوع باختصار انى كنت عايز احجز تذكرة طيران من على موقع الخطوط الجوية البريطانيه دخلت شوفت التذكره و سعرها طالع بالجنيه المصرى و قبل ما احجز التذكره كلمتهم اتأكد انهم هيخصموا الفلوس بالجنيه عشان مينزلش عليا عموله من البنك و فعلا الكول سنتر اكدولى انهم بياخدوا جنيه مصرى.
وتابع عن مشكلته مع بنك CIB ،"حجزت التذكره و فعلا الفلوس اتخصمت بالجنيه. لحد دلوقتي مفيش مشكله بعدها بيومين لقيت ال cib خاصمين منى 10٪ عموله نقد اجنبى كلمتهم فين يا جماعة النقد الاجنبى ده قالولى العمليه دى اتسحبت بالدولار.. كلمت الخطوط البريطانيه يا جماعه انتوا سحبتوا دولار قالولى لا طبعا مصرى و هنبعتلك فاتوره تثبت ده و فعلا بعتولى الفاتوره مفيهاش سنت واحد كله جنيه مصرى و قالولى المشكله من البنك عندك".
وقال " كلمت ال cib مصرين ان العمليه تمت بالدولار قولتلهم طب الناس بعتولى مايثبت انهم سحبوا جنيه ابعتولى انتوا كمان ما يثبت انكم ادتوهم دولار عشان اعرف الغلط عند مين بقالى ١٠ باكلمهم و بابعت ايميلات و باروح لهم الفرع عشان اخد اثبات ان العمليه تمت بالدولار و طبعا مش راضيين يدونى حاجه..كده انا بالنسبه لى ال cib هو الى خد منى 4800 جنيه بدون وجه حق و بيدعى ان العمليه تمت بالدولار بدون تقديم اى اثبات منهم بكده و باعتبرها اتاوه عشان حجزت تذكره طيران".
