"حد يقولنا إمام عاشور اتباع ليه".. خالد الغندور يفتح النار على إدارة الزمالك

وجه الإعلامي خالد الغندور رسائل نارية إلى إدارة نادي الزمالك بسبب التفريط في نجوم الفريق، والأخطاء الإدارية التي دفعت الاتحاد الدولي لكرة القدم "فيفا"، لتوقيع العديد من الغرامات على نادي الزمالك.

"حد يقولنا إمام عاشور اتباع ليه".. خالد الغندور يفتح النار على إدارة الزمالك

وقال خالد الغندور، في تصريحات تلفزيونية، "احنا ليه بيعنا إمام عاشور؟ إمام، كان يتبقى في عقده سنة ونصف، لازم المستشار مرتضى منصور ومجلس الإدارة، يطلع يقولنا الأسباب الحقيقية إللي أدت لبيع إمام عاشور".

وأضاف خالد الغندور، "نادي الزمالك صبر على أشرف بن شرقي لحد ما عقده انتهى ونفس الأمر بالنسبة لفرجاني ساسي ومحمد أبوجبل وطارق حامد، ما كنت أصبر على إمام، إلا لو انت شايف إمام سلوكيًا في حاجة، إمام لاعيب جامد ليه بيعناه؟".

واستكمل خالد الغندور تصريحاته قائلاً، "إيه سبب عدم وضع بند في العقود، بيقول إن اللاعب لو رجع لأي نادي في مصر يدفع مليون دولار زي ما الأهلي عملها مع عبدالله السعيد، أو يكتب في العقد لو عاد لمصر بعد السنة الأولى يدفع مليون و500 ألف دولا والسنة الثانية مليون دولار والسنة الثالثة 500 ألف دولار"، متابعاً، "الزمالك لن يحصل على نسبة من إعادة بيع إمام عاشور، الكلام الذي يُقال أن شركة وكيل أعمال اللاعب هي التي ستحصل على نسبة من إعادة البيع، مجلس إدارة الزمالك لازم يطلع يوضح هذه البنود قولًا واحدًا".

وتابع خالد الغندور، "الزمالك يحتاج صفقات جديدة قبل انطلاق البطولة العربية، الزمالك لن يستطيع قيد صفقات جديدة قبل أن يدفع مليون و500 الف دولار لنادي سبورتنج لشبونة البرتغالي، هذا المبلغ كان ثمن عودة شيكابالا من سبورتنج لشبونة، كنا اشترينا شيكابالا مقابل 580 ألف دولار، الزمالك لم يدفع الفلوس لسبورتنج لشبونة، ودخل في قضايا من 2017 حتى الأن يعني مر 6 سنوات ووصل المبلغ إلى مليون و500 ألف دولار، دي أخطاء إدارية لازم نتكلم عنها بمنتهي الصراحة، زي محمد إبراهيم، السنة اللي فاتت الزمالك دفع مليون دولار لنادي ماريتمو البرتغالي، عشان بند في العقد بينا وبين النادي البرتغالي، إن لو اللاعب انتقل لنادي أخر الزمالك يدفع مليون دولار".

واصل خالد الغندور هجومه على إدارة الزمالك قائلاً، "كان لازم نراجع العقود، محمد إبراهيم مهما كان مستواه أفضل من 100 واحد بيلعب دلوقتي، في النهاية تحملنا فلوس كتير في الفترة اللي فاتت لأخطاء كان من الممكن أن نتفادها، ولازم نتعلم من ده في الفترة الحاية، لأن دي فلوس راحت في الهوا، الزمالك مطالب بدفع مليون و500 ألف دولار في الاول من أجل رفع إيقاف القيد عن النادي، وبدء التفاوض على التعاقد مع لاعبين جدد، وهذا ما يفعله الزمالك حاليًا".

واختتم خالد الغندور تصريحاته قائلاً، “من بعد ماتش القمة وأنا بتشتم وبيتقال لي امشي من القناة أنت مطبلاتي لمرتضى منصور، خلاص علشان سنة خسرنا فيها، ننسى نجاحات رئيس الزمالك طوال 8 سنوات؟ فزنا بالدوري مرتين موسمين غير الكأس وغيرهم كتير، عشان في جماهير زملكاوية ضد مرتضي منصور وخايفين على النادى بقول لهم روحوا شوفوا نادى تاني شجعوه، الجماهير التي تهاجمني وتقول لي خلي عندك كرامة وأترك قناة الزمالك، أرد عليهم وبقول أنا شغال للزمالك فقط".

خالد الغندور: "المسؤولين في الرياضة المصرية بيخافوا من الأهلي وبيعملوله ألف حساب"
 

وجه الإعلامي خالد الغندور رسائل نارية إلى إدارة النادي الأهلي برئاسة محمود الخطيب بصفة عامة وإلى أسامة حسني الإعلامي بقناة الأهلي بصفة خاصة، وذلك عقب تتويج النادي الأهلي بطلاً لمسابقة الدوري المصري للمرة الـ 43 في تاريخه.

وقال خالد الغندور في تصريحات عبر قناة "الزمالك"، "النادي الأهلي استحق التتويج ببطولة الدوري، فهو كان الفريق الأفضل هذا الموسم، عكس فريق الزمالك ، كان بعيدًا عن مستواه الفني في معظم مباريات الموسم".

وأضاف خالد الغندور: "احنا هنا في قناة الزمالك بنقول للأهلي مبروك الفوز بالدوري الأهلي استحق الفوز بالدوري عن جدارة واستحقاق، على عكس أسامة حسني، إللي لما الزمالك فاز بالدوري، كان بيقول (الدوري موجه، دوري شيلونجو، الإسماعيلي بيفوت للزمالك، الزمالك كسب الدوري عشان الأهلي وحش والتحكيم مظبط الزمالك)، ده اللي كان بيتقال".

وتسائل خالد الغندور: "مين إللي عنده مؤامرة مين اللي بيحرض على الفتنة والتعصب؟ أنا بقول إن احنا خسرنا الدوري عشان مكناش موفقين وكنا وحشين، احنا لم نكن موفقين مش كورة بس".

واصل خالد الغندور نجم الزمالك الأسبق تصريحاته قائلاً، "انت بتفقد الدوري (الأهلي)، والزمالك بياخده وانت عندك كل أنواع الاستقرار الإداري والإعلام بيساندك، والمسؤولين في الرياضة المصرية بيخافوا منك وبيعملولك ألف حساب وبيوقفوا الحكام عشانك، ويقعد الحكم سنة ميحكمش حتى لو قراره سليم زي محمود عاشور، احنا عودنا الحكم المصري أوعى تغلط ضد الأهلي، لو غلط هتقعد في بيتكم، اغلط للنادي الأهلي هتستمر في التحكيم مفيش مشكلة، لأن الإعلام مش هيعمل (سبوت) على غلطة للفريق المنافس الذي يواجه الأهلي".