ادفع وبعدين اشتكي.. مواطن يحذر من حيلة "باقات" شركة فودافون
حذر مواطن من شركة فودافون والتعامل معها بسبب سرقتها للعميل ، على حد قوله ، مستعرضا مشكلته قائلا "انهارده كنت حابب اشارك مشكلتى مع Vodafone Egypt كنت مشترك معاهم فى باقة 200 جنية و لما حبيت اغير الباقة جالى رساله بتقول خليك فى نفس الباقة بنص الثمن يعنى ب100 جنيه و فعلا وافقت و بعدين حبيت اجدد الباقة و مكنش معايا رصيد وقتها فلقيتهم بيقولولى ممكن تجدد على النوته فوافقت و لما حبيت ادفع الفلوس لاقيت المفاجأة الغير متوقعة".
وتابع المواطن عن شركة فودافون ،" لقيتهم بيقولولى عليك 320 جنيه طب ليه قالولى علشان انت فى باقة ال200 طب مانتوا قولتولى بنص الثمن قالولى آه قولنا بس السيستم مسمعش ..الله طب و أنا مالى هو السيستم ده انا اللى عامله ده سيستمكم انتو قالولى خلاص هنعملك شكوى بس لازم تتدفع فكرونى بعادل إمام فى المسرحية ".
وقال ،" المشكلة الأساسية و المضحكة فى الموضوع انى كنت محول ليهم من شركة اتصالات تانية علشان كانوا بينصبوا عليا و قولت اروح لفودافون شركة محترمه Vodafone Egypt اتارى المثل اللى بيقول ما اسخم من سيدى إلا ستى عموما انا مش هسكت و هقدم شكوى لشركة نترا و شكوى لجهاز حماية المستهلك".
وكانت سيدة قد وثقت تجربتها من قبل فى تعامل خدمة عملاء فودافون مع العملاء ، قائلة " قمة في قلة الذوق والبلطجه وجالي احساس اجرري يا مجدي انا ايه اللي بعمله هنا في البلد ديه لما ادخل فرع من الفروع المحترمه لفودافون والاقي خمة العملاء اللي المفروض بيتنقو على الفرازه وشغلتهم مش بس تيسير مصالح الناس لا التعامل اللبق واحترام الكبير.. ولا اي حاجه من دول شوفتها الا وكانت بالعكس..لما يكون واحد من المحترمين بتوع خدمة العملاء بيزعق في راجل كبير عشان بيشتكي انه دوره 118 واللي واقف بياخد الخدمه هو رقم 122 مافيش خمس دقايق واحده تانيه صوتها علي عشان دورها عدى وهي قاعده وقبل الموقفين دول سالنا واحد من بتو ع خدمة العملاء هل الارقام دي هي ادوار الناس واحد منهم يرد بمنتهى التناكه انه هي شغاله ومظبوطه والله كان المفروض اصور فيديو قله ادبهم عشان لما شركه كبيره زي فودافون تسيب الاشكال دي في شغلها يبقى بجد الشركه دي لازم تتقفل ..فرع العبور الحي الاول.. والله انا مشيت من غير ماعمل اللي كنت عايزاه عشان عارفه انهم مش هيمشو لي مصلحتي".
