"كانوا هيتعدوا على بابا بسبب فاتورة".. فتاة تتهم موظفى شركة we بالبلطـ*جة
وثقت فتاة تجربتها مع شركة we وتعرضها للمعاملة غير لائقة هى ووالدها على حد قولها ،" قائلة مش بس أسوأ خدمة لا كمان بتشغل بلطجية بيعتدوا على الناس روحت أنا وبابا ندفع فاتورة التليفون في سنترال 2 مدينة نصر للمرة الخامسة تقريبًا وكل مرة موظف الأمن يقولنا من علي الباب تليفون أرضي لا الشبكة واقعة (هي تقريبًا الشبكة مش بتيجي في السنترال دا بالذات).
وتابعت ،" بابا قال للموظف هو على طول الشبكة واقعة قاله ادخل اتكلم مع مديرة الصالة أستاذة حنان مصطفى . دخل اتكلم معاها بتقوله دا عُطل وملناش دخل بيه وبتقوله ادفع فوري هو بقى إجبار يعني إن الناس تدفع فوري أومال السنترال وظيفته إيه وبعدين بابا بيقولها ما أنا دفعت قبل كدا في سنترال المعادي إشمعنا الشبكة مكنتش واقعة بتقوله خلاص حضرتك ادفع في سنترال المعادى
وقالت ،"بابا كلم 111 عشان يشتكيها وبيتكلم في مكتبها وبيقول للموظف هي بتقولي ادفع فوري قعدت تقول لا وأنا مقولتش كدا وبتزعق راح جيه زميلها محمد هاني وعمال يتخانق معانا وكان عايز يتعدى عليا ولما بابا اتخانق معاه عايز يتعدى عليه هو كمان اللي هو إحنا مش هنشتغل وهنقولكم السيستم واقع ولما تيجوا تشتكوا عشان تاخدوا حقكم هنكدبكم وهنتعدي عليكم كمان والسيستم فضل واقع يومها من 10 لحد ما مشينا الساعة 1 كان لسا واقع وجيه في الوقت دا أكتر من 20 شخص عايزين يدفعوا فاتورة التليفون وكلهم من كبار السن يعني هل منطقي إن شركة السيستم بتاعها يفضل واقع اليوم كله طول أيام الأسبوع ونفضل نعطل ناس كبيرة في السن بتيجي بالعافية أصلا ولما يشتكوا نكدبهم ونتعدى عليهم ولما سألنا بتاع الأمن قالنا مفيش كاميرات اللي هو إزاي مكان زي دا مفيهوش كاميرا يعني كل اللي عايز يعمل حاجة يعملها ومحدش يقدر يثبت!".
