أول عيد ميلاد مكونش جنبك.. رسالة مؤثرة من نجل الفنان محمد ثروت أثناء تلقيه العلاج

هنأ أحمد  نجل الفنان محمد ثروت والده بعيد ميلاده برسالة مؤثرة أثناء تلقيه العلاج بعد تعرضه لأزمة صحية منذ فترة يتلقى على إثرها العلاج خارج مصر.

وقال نجل الفنان محمد ثروت عبر صفحته الشخصية على موقع التواصل الاجتماعى “فيس بوك”،" اول عيد ميلاد ليك ماكونش جنبك يا استاذ بس ان شاء الله الصعب عدي وفرج ربنا قريب ونرجع نتجمع كلنا. كل سنه وانت عظيم و احلي واجدع واطيب اب و صاحب واخ كبير وربنا يخليك لينا ويكرمك علي كل المجهود الي بتعمله معانا مع ان جيه دورنا اننا احنا الي نخدمك وكل ما اكبر بعرف قد ايه انت عظيم في قيمك واصولك الي علمتهالنا و ربيتنا عليها انا وداليا، في سيرتك الطيبة الي بتشرف وتفتح الف باب وقلبك الطيب ولو في سبب اننا نجحنا او تميزنا او حد بيحبنا او بيحترمنا ف دة عشان انت ابونا.. كل سنه وانت طيب يا عظيم"

وكان المخرج أحمد ثروت، نجل المطرب محمد ثروت، قد كشف تطورات حالته الصحية بعد إصابته بمتلازمة ميلر فيشر.

ونشر أحمد ثروت، الفيديو عبر حسابه بموقع تبادل الصور والفيديوهات "إنستجرام " علق عليه قائلا:" الحمد لله كرم من ربنا وبفضل دعواتكم انهاردة بعد 160 يومًا صراع مع متلازمة ميلر فيشر، أول يوم أنجح إني أقف تاني علي رجلي بعد عشرات الأسابيع ومئات المحاولات".

تابع: "اتعلمت كتير من اختبار ربنا ليا، اتعلمت الرضا والحمد على كل حال وإن ستر ربنا علينا فوق كل شيء ومدى تحملك بيجي معاه كرمه ليك فالأخر وإنه مش هيخذلك طول ما أنت مسلم أمرك وإن عادي ممكن ابتدي تاني كل حاجة من الأول وإن لسه في أمل طول ما في حياة".

وواصل أحمد ثروت:" ربنا ألهمني في أول الإصابة وده خلاني أوثق الاختبار ده من أول يوم حتى الآن، وده عشان أول ما أقوم إن شاء الله أتمنى أكون سبب في التوعية لمثل هذه الأمراض النادرة وإزاي لو لقدر الله اتصابت أنت بيها أو حد قريب منك تتعامل معاه إزاي لأن جزء كبير من التعافي هو الحالة النفسية للمصاب".

واستكمل: "حابب أقول حاجة من قلبي بجد، الكرم اللي ربنا كرمني بيه ده نور لي حاجات كتيرة، خلاني أقعد مع نفسي أقيمها وعرفني قيمة نعمة نعمة هو مديهالي زي أني أدخل الحمام لوحدي أو أعرف آكل لوحدي أو أمشي خطوة أو حتى اتحكم في جسمي واللي معظم الناس ماتعرفوش أني كنت فقدت بصري لأسابيع في عيني اليسري وفقدت القدرة على التحكم فالكلام لاكثر من شهر".

واضاف:" كل يوم كنت بسأل نفسي وأنا في ظروف دي لو ربنا أفتكرني هو أنا قدمت إيه لكل اللي حواليا؟، ووصلت دلوقتي إن بقى عندي هدف أكبر من إني أنجح أو اشتغل لنفسي بس، خلي عندي إحساس بحاجات قيمتها لما دخلت فيها وحسيت بيها زي مثلًا واحد جاله المرض اللي صابني ومش عارف وفاكر إن عنده مرض تاني وتوفي عشان عنصر الوقت لم يسعفه أو مريض تاني عرف التشخيص ومعهوش فلوس العلاج نظرًا لأن العلاج بتاع الأمراض المناعية زي حقن الأجسام المضادة غالية جدًا".

واختتم أحمد ثروت . إن شاء الله قريبا جدا هقول عن حاجة شغال عليها هتخفف المعاناة عن أي حد محتاج مساندة أو مساعده ويا رب ربني يقدرني وماشوفش حد يدخل في اختبار زي اللي أنا مريت بيه.