محمد فراج يرد على هجوم الجمهور بعد تصريحاته عن داليا شوقي

علق الفنان محمد فراج، على استياء الجمهور من تصريحاته الأخيرة بعد الدفاع عن شقيقة زوجته الفنانة داليا شوقي بعد موجة الانتقادات التي تعرضت لها بسبب مشهد في مسلسل "سفاح الجيزة".

 محمد فراج يرد على هجوم الجمهور بعد تصريحاته عن داليا شوقي

ونشر محمد فراج عبر صفحته على موقع تبادل الصور والفيديوهات “إنستجرام” قائلا: “مساء الفل، فوجئت بعدد كبير من أصدقائي بيقولولي مزعل الجمهور ليه يا فراج؟، بصراحة استغربت من السؤال، أنا بقالي أكتر من 15 سنة ممثل، عمر ما حصل إن اتقال لي جملة زي دي”.

تابع: “القصة باختصار، أنا كنت في العرض الخاص لفيلمي، واتسألت من برنامج محترم عن ردي على شائعة انفصالي عن بسنت وانتقاد أداء داليا شوقي، ورغم إن لا الوقت ولا المكان يستحملوا الكلام ده لأننا بنحتفل بالفيلم لكن احترامًا للإعلام بشكل عام جاوبت”.

روى محمد فراج كواليس تصريحاته قائلا:" بس زي ما كلكم عارفين أن صيغة السؤال بتتحذف في المونتاج والخبر اللى بينتشر هو الإجابة فقط لا غير فالسؤال كان: إيه ردي على حملات الإهانة والتجريح فأنا قلت إن ده ماينفعش ناخده بجدية لكن مكنتش بتكلم على الجمهور بشكل عام إطلاقًا".

وأضاف: “أنا متأكد إن جمهوري اللي بنى اسم محمد فراج فاهم معنى كلامي كويس وعارف إن في فرق بين وجهة النظر وبين الإهانة والتجريح، ومتأكد إن جمهوري عارف إني مستحيل أحجر على رأيه، وياريت دايما الحكم على أي موقف أو رأي يكون بنظرة شاملة، مش من خلال سطرين متاخدين من مانشيت على فيس بوك، أو من فيديو اتعمل له مونتاج”.

واختتم: “معلش طولت عليكم بس يمكن اللي حصل ده كان فرصة لتأكيد أمتناني الدائم بآراء الجمهور وإني بستفيد من النقد والملاحظات زي ما ببقى سعيد بالإشادات..بحبكم وشكرا لدعمكم ليا من بداية مشوارى”.