شوبير مهاجماً أحمد مجاهد: "مش كل قرار خده الجناينى تمسحه بأستيكة"

واصل الإعلامي أحمد شوبير هجومه أحمد مجاهد رئيس اللجنة الثلاثية لإدارة اتحاد الكرة، مطالباً إياه بالكشف عن الشخص الحقيقي الذي يدير الجبلاية في الوقت الحالي.

وقال أحمد شوبير في تصريحات عبر برنامجه "ساعة مع شوبير" على إذاعة "أون سبورت إف إم": "كل خطط الاتحاد الأحادى باظت بعد اجتماع الأندية، اتحاد الكرة عامل زى عنتر فى الأسكيتش الشهير أوعى يجيلك عنتر، عايز يولع روما بحالها، شوية يقول هنلغى الفار ولما الأندية اعترضت قال خلاص هو أنتم زعلتم مش هنلغيه، هنعمل رابطة للأندية ورجع قال لأ خلاص مفيش رابطة وده مش تراجع محدش يقول علينا بنتراجع".

وتابع شوبير: "بيقول إنى داخل معاك معركة شخصية وأنا بقوله معنديش معركة شخصية معاك ولا مع غيرك ولا مع كبيرك لإنك لا تستحق معركة شخصية من الأساس".

وأردف: "أنا هفضل أسأل من يدير الكرة فى مصر، طول عمرنا عارفين إن الكرة تدار من خلال لجان المسابقات والحكام وشئون اللاعبين وكل ده مشيته، لازم نعرف من يدير الجبلاية ، بقولها بحرقة مينفعش اتحاد كرة يديره فرد واحد".

وأضاف: "لو متخانق مع عمرو الجناينى إضربوا بعض فى الشارع لكن بعيدا عن الجبلاية مش كل قرار خده الجناينى تمسحه بأستيكة، كنت أول من انتقد اللجنة الخماسية فى بداية عملها، لكن تغير موقفى بعد ماشوفت انجازاتهم لكن مينفعش اتحاد الكرة يخدم على بنى ادم واحد عشان يبقى رئيس اتحاد الكرة".

وواصل: "فين أدوار أعضاء المجلس زملائك وفين رؤساء اللجان، داخلين على فترة انتقالات شتوية ومفيش لجنة شئون لاعبين ، فين لجان القسم الثانى والثالث اللى طردتها بره بدون سبب".

واختتم: "كوارث وبلاوى فى الاتحاد وهفضل أزعق وأصرخ فى الراديو والتليفزيون ، كفاية انى اقول أن فى 8 مليون جنيه مستحقات للاتحاد لدى الكاف والجبلاية بتقول مفيش فلوس ندفع لشركة الفار".