في ذكرى وفاة ممدوح عبد العليم.. تعرف على تفاصيل اللحظات الأخيرة في حياته (فيديو)
الثلاثاء 05/يناير/2021 - 03:15 م
تحل اليوم الذكرى الخامسة لوفاة الفنان ممدوح عبد العليم، الذي اشتهر بلقب "رفيع بيه" بعد دوره في مسلسل "الضوء الشارد"، صاحب الأداء المتميز والأسلوب الراقي.
وكشفت الإعلامية شافكي المنيري زوجة ممدوح عبد العليم عن اللحظات الأخيرة في حياته، خلال لقاءها مع الإعلامية منى الشاذلي ببرنامجها "معكم" عبر شاشة قناة cbc، وقالت: "يوم الوفاة كان بيقرأ الصبح كعادته، وكان بيقرأ سيناريو الجزء الأخير من (ليالي الحلمية)، وكان قاعد مع (هنا)، وأنا خرجت ألعب رياضة، كلمته وسألته هتعمل إيه، قال هروح الجيم، وبعد كده كان معزوم عند أصحابه، هو راح الجيم فعلا بس أنا كنت مشيت من النادي، ومأخدش في الجيم نص ساعة وحصلت الوفاة".
وتابعت: "هو كان بيجري شوية الأول وبعد كده يروح لبقية الآلات الرياضية، وهو موقعش على المشاية الكهربائية زي ما اتقال، هو أدرك السر الإلهي، فمال على الأرض، لكن موقعش، ومتعورش ومتخبطش، ومقلش أي حاجة، لم يتكلم مطلقا".
وأضافت: "في الأول مكنوش عارفين أنه مات، تخيلوا أنه مغمى عليه، ومكنوش عارفين ده مين، في بنت منهم فتحت تليفونه وكلمت آخر رقم مكلمه، كان مدير بنك وهو صديقه جدا، قالتله التليفون ده بتاع مين، قالها ممدوح عبد العليم، قالتله أعمل إيه، قالها كلمي شافكي مراته أكيد هتلاقي نمرتها، هو برضو تخيل أن ممدوح أغمى عليه، كلمتني وأنا كنت لابسة ورايحة أعزي، مردتش عليها، كلمت (هنا) اللي تلقت الخبر وأنه اتنقل للعناية المركزة، (هنا) كلمتني وأنا كلمت أخوه الدكتور".
وأختتمت حديثها: "روحت المستشفى وأنا متوترة ومتخيلة أن في حاجة، بس مش الموت، الدكتور قابلني قالي ممكن أعزيك، أنا مسمعتش هو بيقول إيه، أنا تصورت أن ممدوح بيمثل، قلت للدكتور كده وقتها، قلت ممدوح ممثل بارع وهو بيمثل، كنت في حالة هيسترية، فقدت الزوج والأخ والصديق والإنسان المهذب الخلوق، وأنا اتشرفت إن اسمي كان جنبي اسمه طول السنين اللي فاتت".
