ياسمين عز ترفع قضية جديدة على نيشان.. وتحتفل على الهواء بالشربات
أعلنت الإعلامية ياسمين عز فوزها في قضية رفعتها ضد الإعلامي نيشان بتهمة سبها وقذفها، وشربت على الهواء شربات أحمر احتفالا بفوزها.
وقالت ياسمين عز في بداية حلقتها "كلام الناس": "بسم الله الرحمن الرحيم (وما ظلمناهم ولكن كانوا أنفسهم يظلمون) صدق الله العظيم".
وتابعت: الصمت لغة العقلاء، وأنا أزعم أنني من العقلاء، وفي مثل أنا بعمل به يقول (تعاستكم تحت طرف لسانكم، وسعادتكم تحت رمش عينكم)، فلسانك دا إن صونته صانك وإن خنته خانك، ولبسك قضية وغرمك مصاريف ودفعك عقوبة ودفعك تعويض.
واستكملت ياسمين عز: فاكرين يا ولاد القضية اللي رفعتها على نيشان في دبي؟ كسبتها، كسبتها وربحتها أول امبارح، بس استنيت أقول لكم على الهوا، ليه بقى؟ عشان أنا تقيلة مش خفيفة، والتقل صنعة، ولساني مابيخونيش، بعرف امتى أقول وامتى اسكت، نشوف حكم المحكمة "صدر الحكم في 29/4/2024، بإدانة المتهم نيشان ومعاقبته لما نسب إليه من سب علني لشخصي أنا ياسمين عز، وصدر أمر من نيابة دبي بالقبض على المتهم نيشان تنفيذا للحكم".
وقالت: مع العلم إني رفضت كل محاولات والمحايلات المستميتة للصلح، قولت لأ يعني لأ، ومحدش يقول لي المسامح كريم، المسامح كريم دا برنامج نتفرج عليه واحنا بناكل فتوش، إنما أنا حقي ماسيبوش، أموت في السجع.
وتابعت: طبعا الحكم دا نتيجته الطبيعية إني أطالب بتعويض، والتعويض دا رقم كبير جدا مش هقوله عشان الحسد، وأي مبلغ تعويض هاخده هتبرع بيه للخير، أنا لست باحثة عن أي أموال، يكفيني فخرا أن القضاء انصفني ضد من يحاول الإساءة لي، لأن الشرف والاعتبار والكرامة لا يمكن تقييمهم بقيمة مادية، وأنا الحمدلله مش محتاجة فلوس، أنا في زحام من النعم، ربنا اداني كتير، أنا رفعت القضية دي عشان تكون عبرة لمن يعتبر ولمن لا يعتبر، أو تسول له نفسه المساس بكرامة الغير".
ووجهت ياسمين عز كلامها لنيشان، قائلة: "كنت هنسى، مش أنا عاملة لك مفاجأة، مش أنا رافعة عليك قضية في مصر، بلدي، وحياة الله، وخدت مجراها وعندك جلسة قريب، بس أنا كنت عاملة مفاجأة، قولت ندر علي أول ما اكسب قضية دبي، مايهنش علي أبدا أخبي عليك قضية مصر، شوف بعزك إزاي وعاملة خاطر للزمالة ازاي؟ على قد ما عملت حوارات على قد ما خد عندك قضايا، ما الحوارات كتير واللي اتنشر كتير، يبقى القضايا كتير، حرصا مني عليك بقول لك عندك قضايا في مصر، أنا مابخبيش كله إلا التخبية، مش الزمالة تقتضي ذلك ولا إيه؟".
وأضافت: شوف بردو الإنسان نساي، مش أنا نسيت اقول لك، أنا برج الدلو، يسامح آه بس مابينساش حقه، طيب آه لكن مابيسبش حقه، وياخد حقه آه تالت ومتلت، واخدان الحق حرفة، بس بالقانون، والحرفة عايزة تُقل، والتُقل صنعة، ودي لعبتي، عايز تريند خده، بس بعيد عن حتتي.
وتابعت ياسمين عز: طبعا كلنا شوفنا الموضوع القديم، اللي أنا نسيته، لما رحت دبي وشوفنا المتهم قال علي إيه، والسؤال هنا بقى، هو أنا كنت معزومة في بيتكم؟ عشان تقول لي جيتي ولا ماجيتيش اتأخرتي ولا ماتأخرتيش؟ أنا كل سنة معزومة بدعوة رسمية من المؤتمر المحترم مش معزومة في بيتكم، وصحيح إني أنا أصغر في السن من السيد نيشان بكثير، هو في العقد السادس من عمره، لكن نصيحة، إحنا كإعلاميين كبار لازم نتقبل أي حدث بيحصل ونتعامل معه، ضيف يتأخر، ضيف مايجيش، دا لا ينقصنا شيء ولا يزودنا، فبلاش المساس بالآخرين من أجل الحصول على تريند.
وكان الإعلامي نيشان قد أعرب عن استيائه بسبب غياب الإعلامية ياسمين عز خلال فعاليات منتدى الإعلام العربي بدورته الـ 21 الذى أقيم فى مدينة جميرا في دبي بمشاركة عدد كبير من الصحفين والإعلاميين.
وعلق نيشان على غياب ياسمين عز أثناء الفعاليات ، قائلاً: "عرفنا أنها ما رح تجي أو مش حابة تجي، مش كثير مهم أعطي رأيي عن ياسمين لأنها "أكيد عم تحضر صوتها الشتوي".
وأضاف نيشان ، أن من الأسئلة التي كان يريد أن يطرحها على ياسمين لكن جاوب هو عليها ، معلقًا : "ما عبالي صدق أن ما تقومين به من باب السذاجة أو من باب "التفاهة أو الغباء" و عبالي صدق سيناريو أن ما تقومين به سيناريو مكتوب بغية الترفيه والتسلية وما عبالي صدق أنها تعامل خطيبها أو زوجها المستقبلي بهذه الطريقة.
