الراجل مات قضاء وقدر.. حمو بيكا يدافع عن عصام صاصا
دافع مطرب المهرجانات حمو بيكا عن زميله مطرب المهرجانات عصام صاصا، فى أزمته الأخيرة التى تسبب خلالها فى وفاة موظف بعدما صدمه بسيارته أعلى الطريق الدائرى.
وقال حمو بيكا ،" عصام صاصا عمره في حياته ما كان مؤذي او شخص مش كويس، وأنا مش بكتب الكلام ده عشان اظيط فى الظيطة، ومش محتاج أظيط أنا كحمو بيكا ، انا اعرف الراجل ده من سنين السنين كمان .. خبط واحد بعربيته قضاء و قدر".
وتابع بيكا : " ياريت بقى الناس بتاعت التيك توك والصحفيين والناس اللي هي بتظيط دي متركبش المركب بالمقلوب، وتفضل تقول كلام محصلش، الراجل ده دلوقتي في محنة وفي اكتر مش شخص بيطلعوا يعملوا فيديوهات ملهاش اي تلاتين لازمة، ملكمش الحق انكم تتكلموا وملكمش الحق انكم تطلعوا تجيبوا سيرتو بأي حاجة".
وقال حمو بيكا : "أنا شايف كمية فيديو ع التيك توك بجد حاجة تقرف حاجه تدل على إن احنا شخصيات معندهاش مبدأ، وشخصيات مقرفة أي كان جريده أي أو الصحفيين اللي بيمشوا بالتليفونات، في أي حتة دول انتم ملكمش الحق انكم تتكلموا في اي حاجة أصلا ، و مين أداكم الحق للكلام ده بس بجد انتوا أبشع مما تتصوروا".
ودافع عن زميله قائلا: " الراجل مات وده نصيبه الله يرحمه ويرحم جميع أمواتنا لكن المزايدات ملهاش لازمة صدقوني، والقانون والدولة هما الوحيدين اللي لهم الحق في الكلمة، أو في أي حاجه تخص الموضوع ياريت بقى نهدا ونبطل هري، ونهدى كل شوية جريدة تطلع لنا واحدة مبتعرفش تتكلم تفضل تهري في الموضوع .. ربنا يرحم اللي مات برحمته .. وربنا يرجعلنا عصام صاصا بالسلامة".
