رئيس البعثة الطبية المصرية بأولمبياد باريس يدافع عن جنى علي.. ويؤكد: اللاعبين بيخافوا من السوشيال ميديا

دافع حسن كمال رئيس البعثة الطبية المصرية في أولمبياد باريس عن جنى علي، الحاصلة على المرتبة الـ63 بين 64 مشاركة، فردي السيدات في مسابقة القوس والسهم بدورة الألعاب الأولمبية "باريس 2024".

رئيس البعثة الطبية المصرية

وقال: "مساء الخير .. حيث أنني باتشرف بكوني رئيس البعثة الطبية المصرية في الأوليمبياد، والصحة النفسية جزء من مسئولياتنا تجاه اللاعبين.. خليني اشرحلكم حاجة.. البعثة - زي اي بعثة في العالم  - مكونة من ٤ مستويات من اللاعبين . اولاً أبطال مرشحين  للحصول على ميداليات .. ثانيا أبطال محتملين مش مرشحين لكن قريبين .. ثالثا لاعبين متوسطين في المستوى هيكونوا في مراكز متوسطة لكن صعب يحققوا .. واخيراً: لاعبين مؤهلين لكنهم بعاد عن المنافسة لكن وجودهم مهم ليهم ولتأسيس مستقبل اللعبة في مصر ورفع المستوى تدريجيا".

وتابع: “سعادتك لما بتتريق على اللي خسر  وكان بعيد  وتعمل حفلة كبيرة عليه مش بتغير نتيجته أثناء الدورة .. انت بتحط ضغط رهيب على الناس القريبة من تحقيق ميدالية واللي لسه هتلعب .. اللعيبة بقت تخاف من السوشيال ميديا اكتر ما بتخاف من المنافسين ..  أنا أتمنى في يوم اقدر أقول لكل اللعيبة ما تخافوش .. الناس في ضهركم سواء كسبتم او خسرتم.. واتمنى تكونوا في ضهرهم فعلا لان اللاعبين اللي هنا دول أبطال شبه كل بيت وكل واحد فيكم .. وبقوا أبطال اوليمبيين واقفين في وسط العالم كله وبتكلفة لا تقارن بألعاب تانية ولا بدول تانية ..الشباب مستنيين تشجيعكم وان شاء الله يرفعوا راسكم”.

وقال: “ملحوظة الصورة صباح اليوم مع بطلة القوس والسهم جنى علي لما لقيتها قاعدة لوحدها قلتلها أنا فخور بيكي و قومي نتصور .. وهي شابة لطيفة وطيبة جدا على فكرة .. وبطلة كبيرة على مستوى قارة أفريقيا وان شاءالله اللي جي افضل”