بسبب حقن التخسيس.. إدوارد يصاب بشلل المعدة

أعلن الفنان إدوارد عن إصابته بشلل المعدة بسبب اتخاذه حقن التخسيس لإنقاص الوزن، كما كشف إدوارد عن تفاصيل إصابته بشلل المعدة . 

إصابة إدوارد بشلل المعدة 

نشر إدوارد ستوري على صفحته الرسمية عبر موقع تبادل الصور والفيديوهات "إنستجرام" وعلق قائلا : "مواظب على دايت مع الدكتورة والحقن لحد الأسبوع اللي فات فجأة غير جعان خالص وقعدت حوالي 4 أيام ولم أدخل حمام ولا قادر أكل ووجع في معدتي جامد، دكتورة التغذية قالتلي وقف الحقن وروح لدكتور جهاز هضمي فورًا وعملت كده روحت لدكتور قالي حصلي شلل مؤقت من الحقن في المعدة وكان مفروض تتابع معايا مع دكتورة التغذية قولتله أنا اللي كنت بطنش عشان كنت تمام، قالي الحقن مش وحشة ومفعولها كويس، بس أنا بنصح أقصاها 3 شهور بس تاخدها وتوقف فترة وترجع تاني، بس لازم طبعًا برده متابعة مع دكتور تغذية".

وأضاف : "من غير ما طول عليكم أنا بقالي أسبوع بتعالج وعملت كل التحاليل حتى صبغة على الكلى، والحمد الله معنديش غير شوية زيادة في الأملاح زي كل المصريين بطني بتتحسن واحدة واحدة، ولسة المعدة وجعاني، والدكتور قالي من 8 لـ9 أيام ترجع عادي، وإن شاء الله هبقى كويس، أنا حكتلكم تجربتي عشان بقولكوا إن الحقن مش وحشة وجابت نتيجة هايلة معايا بس لازم مع دكتور التغذية دكتور جهاز هضمي وكمان دكتور قلب لو أمكن عشان سرعة ضربات القلب، أتمنى أكون قدمتلكم معلومات كويسة عن تجربتي وربنا يشفي أي حد تعبان وأشوفكم دايما كويسين".

آخر أعمال إدوارد 

جدير بالذكر، كان آخر أعمال إدوارد مسلسل وبقينا اتنين الذي عرض في السباق الرمضاني الماضي ويتكون المسلسل من 15 حلقة، ويعد من بطولة كل من شريف منير ورانيا يوسف وميمي جمال وطارق عبد العزيز ويوسف عثمان ونانسي هلال ونوران ماجد وعزت زين وتقى حسام، ومن تأليف أماني التونسي، وإخراج طارق رفعت . 

في إطار كوميدي درامي، يتناول العمل قصة امرأة مطلقة تتحدى نظرة المجتمع لها، ومحاولة التصدي لتأثير قرار الانفصال عليها وعلى أولادها الشباب، وكذلك طليقها.