ابنة عم عمر القاضى: "كان دايما يقولنا حد يطول يبقى شهيد"
الثلاثاء 09/مارس/2021 - 12:34 م
قالت سامية القاضي ابنة عم الشهيد عمر القاضي، إن ابن عمها كان إنسانا شجاعا ويتمتع بإرادة قوية، وكان دائما ما يتحدث عن أنه سيكون من شهداء مصر، موضحًا: "لما كنا نقول له خد بالك من نفسك يا عمر، كان يقول إيه المشكلة حد يطول يبقى شهيد؟! يا رب أبقى شهيد".
وأضافت "القاضي" في مداخلة هاتفية ببرنامج "صباح الخير يا مصر"، المُذاع عبر القناة الأولى، والفضائية المصرية، و يقدمه الإعلامية جومانا ماهر والإعلامي حسام حداد: "عمر يعيش معنا في نفس البيت، وآخر مرة التقينا به كانت في شهر رمضان، وفي ليلة سفره فطرنا سويًا، وكان لقاءً غريبًا، لأنه كان يشعر بأنه يستشهد".
وتابعت: "قعد مع الأطفال وهو بالنسبة لهم حاجة كبيرة جدًا، وحتى الآن لازم يروحوا يزوروا مقبرته، وبيدعوا ويكلموه ومنتظرين إنه يرد عليهم بسبب قربه وحبه لهم .. كان ملاكا، ولما قلنا له خد بالك من نفسك في الزيارة الأخيرة، قال إيه المشكلة؟! هتبقوا اخوات الشهيد وهتبقوا معانا في الجنة وزود في الكلام ده وولعنا نفسيًا، لأن كلامه كان في حاجات كتير مختلفة عن كلامه معانا في العادي".
وأوضحت، أنها علمت بنبأ استشهاده من بعض معارفها في العريش، إذ اتصلوا بها وأخبروها بأن ضابطا تابع لقوات الشرطة أستشهد في هجوم على كمين: "كان الخبر مفجعا، وفي نفس الوقت جالنا اتصال تليفوني إن عمر اتصاب، ووقتها قلبنا حسّ إنه أصيب، وحاولنا بقدر الإمكان إنها متعرفش لحد الساعة 8 صباحا، رغم إنها كانت بتابع التلفزيون عشان حاسة بحاجة هتحصل".
