شادى خفاجة يستغيث:"أبويا بيموت قدام عينى .. إلحقونا"
الخميس 01/أكتوبر/2020 - 08:04 م
استغاث الممثل الشاب شادي خفاجة، بعد تدهور الحالة الصحية لوالده ودخوله في غيبوبة، عبر حسابه الرسمى بموقع "إنستجرام".
ونشر شادى على مواقع التواصل الإجتماعى صورة من التقارير الطبية الخاصة بوالده وكتب عليها :" انا مش عاوز ابويا يموت، ارجوكم ساعدوني"، امبارح ابويا بدأ يخرف و يفقد الوعي و بدأ يدخل في غيبوبة ، كلمت الدكتور الجراح بتاعه بقوله "ابويا بيموت!!، رد عليا يقولي "اعمله ايه!؟" الدكتور الجراح اللي عمل عملية ملوثة بيقول على العيان بتاعه اعمله ايه!؟ ".
وتابع:"ابويا دخل يعمل عملية فتأ في الصدر و ركب شبكة بتاريخ ٥ اغسطس بمستشفى عين شمس التخصصي و نصبوا عليا قالولي ادفع ٢٥ الف جنيه تأمين و اللي هيتبقى بنعملك بيه استرداد، فوجئت بعد العملية بفاتورة ب ٩٠ الف جنيه ، اتصرفت و مكتب رئاسة الوزراء الدكتور مصطفى مدبولي و الدكتور اشرف ذكي جابولي قرار بتخفيض ٣٠٪ من المبلغ و كتر الف خيرهم بأمانة و ربنا يبارك فيهم".
وأضاف:"ابويا فضل يتابع مع الدكتور الجراح (احمد عادل عباس عبد الشافي - جامعة عين شمس) في عيادته و في المستشفى و جرح ابويا دون تحسن مع فقدان الشهية و حالة اعياء عامة جسديا و ده بسبب ان الجرح ملوث جدا من العملية و النتيجة ان الدكتور طلب حجزه و دخوله عمليات مرة تانية في مستشفى عين شمس التخصصي مرة تانية و كلفتنا ١٠ الاف جنيه مقابل ( يوم واحد فقط) و خرج على البيت ، و من يومها الدكتور بيبعت تمريض يغير ع الجرح و بيتابع معاه و لكن دون جدوى او تحسن و ده منظر الجرح و الحال اللي ابويا وصل ليه.. ابويا حرفيا بيموت مني و مش قادر اعمل ايه انا و اخواتي".
وأختتم شادي كلامه:"احنا من امبارح في #مستشفى_الدمرداش لاني مش هقدر ادخل تاني عين شمس التخصصي ويتعمل عليا نصباية زي كل مرة و عدى على دخول ابويا ٢٤ ساعة في الدمرداش و رامين ابويا في غرفة فيها ٦ مرضى بدون تكييف او مروحة و ده خطر جدا على الجرح في الجو ده ، و مفيش لا تمريض يركب له محاليل تغذية وريدية ولا في دكتور جراح يبص على حالة الجرح و التلوث اللي هو وصل اليه نتيجة العملية و الدكتور نفسه اللي عامل العملية مش عاوز حتى يجي يبص على الحالة بتاعته بالرغم من انه شغال برضه في مستشفى الدمرداش، معقول ده حال المستشفيات في مصر و في النهضة اللي البلد فيها دلوقتي ، و لو انا مش قادر ادفع ٩٠ الف جنيه في مستشفى خاص هترمي زي الكلب كده في مستشفيات بلدي الجامعية اللي المفروض سمعتها مسمعة في الوطن العربي كله، ارجوكم ابويا والله هيروح مني لو مالحقتوش في ال ٢٤ ساعة دول، دي صور تقارير العمليتين اللي اتعملوا في عين شمس التخصصي و دي صورة بطنه من اسبوع و الصورة التانية حاليا".
