أسوأ ناس اتعاملت معاها.. عبد الرحمن شيكا يهاجم مسؤولي مودرن سبورت

هاجم نجم نادي مودرن سبورت عبد الرحمن شيكا مسؤولي النادي على صفحته الرسمية على موقع الصور والفيديوهات إنستجرام.

عبدالرحمن شيكا يهاجم مسؤولي مودرن سبورت

وكتب شيكا: “المشكلة مكنتش في اللاعيبة اللي انتو استبعدتوها ومش عشان أنا واحد منهم، بس لولا الأربعة لاعيبة دول بعد ربنا والكابتن مجدي عبد العاطي مكنش زمان الفرقة دي قعدت في الممتاز السنة دي لأن الدنيا جوا خربانة خالص، دي كلمة قليلة”.

وتابع حديثه قائلاً: وللحديث بقية يا أسوأ ناس اتعاملت معاها في حياتي والله.

حسام حسن يهاجم مسؤولي مودرن سبورت

ويعتبر هجوم عبدالرحمن شيكا ليس الهجوم الأول من لاعب فريق مودرن على مسؤوليه.

حيث هاجم مهاجم الفريق حسام حسن مسؤولي النادي وكتب: في البداية أنا مكنتش ناوي أتكلم في أي أحداث داخل النادي وعمري ما اتكلمت على نادي لعبت له، لكن للأسف بعد ما انهيت تعاقدي مع نادي مودرن فيوتشر بإصرار مني فوجئت منهم منزلين خبر مش قادر أفهم توقيته وليه وإيه الهدف منه بما أنهم خالفوا الاتفاق اللي انتهيت بيه التعاقد والتأكيد عليا أكثر من مرة، ف أنا كان لازم أوضح دفاعًا عن نفسي.

وتابع: ومش هقول دافع عن زمايلي اللي اتظلموا وبيتقهروا من إدارة النادي بلا مبرر سوى بعض اللاعيبة المقربين من رئيس النادي وبياخدوا مستحقاتهم طبعا عشان بيقوموا بدورهم على أكمل وجه، لو عاوزين تعرفوا الحقيقة اسألوا اللاعيبة اللي مانعهم رئيس النادي بأمر مباشر من نزول التمرين وإيقاف مستحقاتهم وممنوع حد يتكلم أو يفتح بوقه وكأننا عبيد عنده.

واستكمل: وأنصح كل لاعيبة مصر قبل ما تفكر تيجي النادي ده يسألوا اللاعيبة اللي عندها ضمير هيقولكم إيه اللي بيحصل جوه النادي، في أحداث كثيرة ولاعيبة هتطلع تتكلم على اللي بيحصل معاهم وتدمير نفسيتهم بلا مبرر، وفي حقائق هتظهر في الوقت المناسب في لقاءات تلفزيونية هتوضح جزء صغير من اللي بيحصل جوه النادي، من مسؤول بيذل اللاعيبة ويظلم، الله يرحمك يا أحمد رفعت.