إسراء عماد تكشف لـ"مصر تايمز" تفاصيل اعتداء زوجها وشقيقه عليها لإرضاء أمه (بث مباشر)

كشفت الفتاة إسراء عماد، تفاصيل جديدة فى واقعة قيام زوجها بالاعتداء عليها وتشويه وجهها بسلاح أبيض، محدثًا بها إصابات بالغة.

وقالت "إسراء"، فى تصريحات خاصة لـ "مصر تايمز": اللي حصل أن أمي وأمه ضراير.. أمه دايما كانت بتكرهني وبتعاملني وحش.. يوم الحادثة كنت رايحة أصالحه وهي نزلت شتمتي وهددته وقالتله هات مفتاح العربية اللي هي جايباهاله.. لما شتمتني قلتله عاوزة حقي من مامتك.. هددته أني هكسر إزاز العربية".

وأضافت "إسراء": "لما هددته اني هكسر العربية مسك مطواه وضربني بيها ف وشي ورقبتي مسابنيش إلا اما وقعت.. لما وقعت شالني وحطني فى العربية وضربني بالمطواه تاني.. وأمه رمت له ملاية وقالتلي لفها فيها وارميها فى البحر يا عند بيت أهلها.. وأخوه أول ما شاف شكلي قاله متفقناش على كدة".

وتابعت "إسراء": "وداني المستشفى وقالي لو حد دخل قولي إن ناس طلعوا عليكي وعملوا فيكي كدة.. الدكاترة والممرضين لما سمعوه قالولي هو اللي عمل فيكي كدة وخدوه وقبضوا عليه.. وبعدها أخدوني فى المستشفى شفتي كانت واقعة ووشي كله كان مليان دم.. الدكاترة صوتوا وعالجوا الجروح اللي في وشي".