ناجى من انهيار عقار جسر السويس لـ"مصر تايمز": "حاجتنا اتسرقت وأهلى كلهم بقوا جثث"

وقال "فادي"، فى تصريحات خاصة لـ"مصر تايمز": "يوم الحادثة كنت برا البيت.. فجأة لقيت حد من جيراني بيتصل بيا وبيقول العمارة وقعت.. روحت لقيت كل حاجة فى الأرض.. قعدت 20 ساعة بدور على أهلى وبحاول أطلعهم من تحت الأنقاض.. كلهم طلعوا جثث". 

وأضاف الشاب: "كل حاجة راحت.. أختى كانت هتتجوز وجهازها كله إتسرق.. مجاتش على كدة بس كان فيه شنط سفر فيها فلوس وأجهزة ودهب وكل ده مش موجود.. الناس بقت تقولي فيه حد جه وأخد أجهزة كهربائية وحاجات من شنطكوا".

وتابع: "الشنط اللي اتسرقت كان فيها 50 ألف جنيه ودهب وأجهزة كهربائية كل ده ملقيتهوش.. كل حاجة مش موجودة"، مضيفًا: "عاوز حياتي كلها ترجع زي الأول.. عاوز على الأقل أروح ألاقي أني فى بيت مش بايت عند عمي أو واحد صاحبي".

وكان "فادي"، قد نشر استغاثة عبر حسابه الشخصي على موقع "فيس بوك" عقب فقدان أسرته بالكامل فى الحادث، إضافة إلى فقدان مسكنه ومأواه الوحيد.

وقال "فادي": أنا فادي إيميل بولس.. الناجي الوحيد من انهيار عقار جسر السويس.. أبويا وإخواتي نادين ومونيكا وعمتي ومرات بابا.. كلنا كنا عايشين فى بيت واحد"، وتابع: "فجأة تحس أنك من غير أي حاجة حتى حد يطبطب عليك.. من غير بيت وأسرة أنت فعليًا لوحدك من غير أي حاجة".

وأضاف الشاب: "أختي الصغيرة نادين كانت هتتجوز في شهر 9 اللي جاي.. وانا قاعد بدور فى الأنقاض عن الجثامين بتاعت أهلي كنت بشوف ناس بتيجي تاخد الجهاز بتاع أختي.. الموضوع مش سهل"، وأورد: "أتمنى إن ربنا ميوقعش حد في اللي حصل.. اللي حصل صعب.. الحياة دلوقتي بالنسبالي أنا من غير أي حاجة.. حتى مكان أبات فيه".

وتابع "فادي": "أنا بنام عند عمي دلوقتي.. بلاقي ناس بتكلمني تقولي ماتيجي تبات عندي ما تيجي أعملك أكل.. أنا محتاج الدولة تشوف حل في اللي أنا فيه.. بناشد الرئيس عبد الفتاح السيسي.. إحنا ولادك ياريس.. بعد إذنك شوفلي حل.. أنا دماغي وقفت عن كل حاجة.. ومحتاج حل ضروري وسريع من الدولة".