شقيقة "ضحية عنف الوراق" لـ"مصر تايمز": أختى كانت بتتضرب وجسمها متشوه ومتقطع.. وجوزها كتم نفس بنته الصغيرة.. واتهم أم ولاده بالخيانة.. و"أهل القاتل": ساعة شيطان وملناش دعوة (صور وفيديو)

"كان بيضرب أختي وبيحبسها وجسمها متقطع بسببه".. "كتم نفس بنته الصغيرة".. "اتهم أم ولاده بالخيانة".. "قتل أختى قدام ولادها وهي صايمة".. "حاول يضربنا فى النيابة".. كل هذه الكلمات جاءت على لسان "راندا" شقيقة "مروة.ا"، ضحية العنف بالوراق التي مزقها زوجها بـ 20 طعنة أمام أطفالها لتلفظ أنفاسها الأخيرة صباح تاسع أيام شهر رمضان. 

وانتقل "مصر تايمز"، إلى منطقة الوراق، وقالت زوجة عم المتهم: "أهله رافضين اللي عمله ده.. هي كانت ساعة شيطان وبينهم خلافات كتير.. إحنا منعرفش حاجة دول راجل ومراته قافلين عليهم الباب وحرين مع بعض.. ملناش دعوة بيهم". 

وكشفت "راندا" شقيقة "مروة" ضحية العنف فى الوراق التابعة لمنطقة الجيزة، تفاصيل جديدة حول الجريمة، بعدما تبين أن المتهم اعتاد ضرب زوجته وإحداث إصابات بالغة بها.

وقالت "راندا": "أهل جوز أختي معروفين أنهم وحشين.. ومعرفناش كدة الا أما اتجوزها، أختى ماتت وهى لسه مكملتش 24 سنة حتى وقال أنها بتخونه وده محصلش وهى عمرها ماعملت حاجة غلط كان بيضربها ويحبسها باليومين ويهددها ويهدد أهله محدش يفتحلها وطلقها حوالى 4 مرات وبترجع عشان عيالها ويضربها ويموتها يضرب بنته عندها سنتين وكان بيكتم نفسها بالمخده وهي لسة عندها شهور".

وتابعت: "كان بيضرب حماته وأختى متهنتش معاه يوم واحد وهو أهله وحشين وميعرفوش ربنا وحتى مبيصرفوش عليها ولاعارفه تأكل عيالها طعنها أكتر من 20 طعنة وجسمها كله مشوه ومفتوح بسببه"، مضيفةً: "هو طلق أختى وراح اتجوز عليها وبعدين طلق اللي اتجوزها دى وهى مخلفة منه بنت ميعرفش شكلها حتى وخدت كل حقوقها لكن مروة أختى غلبانة وبلغنا عنه قبل كدا لأنه بيتهجم علينا".

وأضافت: "أخواته جم هددونا عشان نخرجه وخرجناه والحكومة عارفه ده.. كان بيشتم أبويا وأمى ماتت بسبب اللي بيعمله فى أختى والزعل عليها جالها جلطة فى المخ بسببه وأخر مرة رجعتله جابها ميتة وجسمها كله طعن كانت بتجيلنا وشها وجسمها كله متقطع ومتشوه وننزل المستشفى نخيطها".

وقالت شقيقة الفتاة: "أختى عندها 4 عيال ومش عارفه تاكل ولا تأكلهم ولا تشتغل وعشان كدا رجعتله.. مكناش نعرف أنها لما ترجع هيموتها"، وتابعت: "لما شافنا فضل يشتمنا ويهددنا بألفاظ بذيئة ولا كأنه عمل حاجة، وراح يقول لوكيل النيابة أنها كانت بتكلم واحد.. وكيل النيابة قال مافيش صحة للكلام ده".

وأكدت: "قتل أختى وهى صايمة.. جالى تليفون امبارح الصبح.. قالولى تعالى أختك عيانة لما روحنا لقينا عزا تحت البيت.. وروحنا المشرحة حتى مشوفنهاش والناس فى المنطقة قالولنا دى ماتت من الصبح واخواته بلغوا عنه عشان يخلوا مسؤوليتهم"، وأتمت: "لما وكيل النيابة سأل ابن أختى، عن اللى شافه قاله "أنا شوفت بابا مسك سكينة وضرب ماما وهي قالتله ونبي سيبني". 

كانت قد شهدت منطقة الوراق، التابعة لمحافظة الجيزة واقعة مؤلمة حيث قام زوج بقتل زوجته مسدد لها 20 طعنة مدعيًا خيانتها له، وتم ضبط المتهم.

وقررت النيابة العامة بشمال الجيزة، حبس "إبراهيم.ض"، قاتل زوجته 4 أيام على ذمة التحقيقات، وطالبت بسرعة التحريات حول الواقعة، وانتداب الطب الشرعي لتشريح جثة المجنى عليها، وصرحت بدفن الجثة عقب بيان الصفة التشريحية.

البداية بتلقى الإدارة العامة لمباحث الجيزة بلاغا من شرطة النجدة، بعثور الـأهالي على جثة ربة منزل، 24 عامًا داخل منزلها بمنطقة الوراق، وعلى الفور انتقلت الأجهزة الأمنية إلى مكان البلاغ وتم الاستماع إلى أقوال شهود عيان وأقارب المجني عليها.

وكشفت التحريات مباحث الجيزة أن "إبراهيم.ض"، زوج المجني عليها، قهوجي 37 سنة، وراء قتل المجني عليها بعد أن سدد في جسدها 20 طعنة، وتم القبض عليه وبمواجهته اعترف بارتكاب الواقعة وأرشد عن السلاح المستخدم (سكين).