بعد عرض حلقة "عرب شركس".. ابنة الشهيد ماجد صالح تروى اللحظات الأخيرة في حياته

كشفت فرح ماجد ابنة الشهيد ماجد صالح عن سعادتها بعرض حلقة "عرب شركس" في مسلسل "الاختيار 2"، أمس الثلاثاء، متحدثة عن اللحظات الأخيرة للراحل قبل الواقعة.

كتبت فرح ماجد عبر حسابها الرسمي بموقع التواصل الاجتماعي "فيس بوك": "انهاردة الحلقة كانت بعنوان "عرب شركس" المأمورية اللي بابي كان فيها و كان في تصوير حقيقي و فدقيقة ٤.٠١ بابي كان واضح فيها و هو بيعمل شغله بمنتهي الشجاعة و كنت أعرف أنه كان قائد شاطر و بيدخل اي مكان قبل العساكر و كمان العسكري اللي كان بيوصل بابي الشغل كل يوم لما مراته ولدت كلم بابي و قاله انه سمي ابنه علي اسم بابي من حبه فيه".

وتابعت: " انا كنت مع بابي لما المكالمة ديه جاتله و كان مبسوط اوي و من ساعتها و انا نفسي ابقي محبوبة زيه كده. انا فخورة اوي و مبسوطة ب بابي جدا بجد الليلة ديه كان بيلبس الأفارول و كان مبسوط اوووي كأنه رايح فرح و بيسألنا علي رأينا فشكله و كان سعيد بطريقة غريبة اوي و كأنه كان عارف و بيجري علي قدره، طريقته عرفتني انه مش هيرجع المرة دي من فرحته ان دعوته هتتحقق و حتي حضنه ليا قبل ما نام كان سريع و مرضاش اني امسك فيه كتير كأنه بيقولي هنتقابل تاني و انا واثقة في ده ان شاء الله ربنا هيجمعنا".

وأضافت: " انا بحبه اوي و كل وقته معانا كان حلو اوي و عمري ما افتكرله زكري وحشة، فخورة بيه اكتر عشان زي مكان شجاع و شاطر في شغله عمره مأثر معانا كأب و كان أحسن و أشطر اب فالدنيا كلها و كان صاحبي و حبيبي كمان. كان نفسي أقدي معاه وقت أكتر من كده لان ١٤ سنة مش كفاية و لو كنت قعدت معاه ١٠٠ سنة عمره ما كان هيبقي كفاية، بس انا عارفة ان هو ده الخير و ربنا مش بيعمل حاجة وحشة ابدا و ده كان اللي هو بيدعي بيه ديما".

واختتمت حديثها: "انا راضية عن قدر ربنا كل الرضا و عارفة انه معايا طول الوقت و مش بيسبني و من اول اليوم الصعب ده و هو مسبنيش زي عادته. شكرا عشان انت احسن اب فالدنيا، عشان سبتلي احلي زكريات، عشان سبت سيرة تفضل عايشة من بعدك، شكرا عشان ربتني و وثقت فيا و عرفتني ان حتي لو انت مش معايا فانت واثق فتربيتك و اني اخاف زعلك و مخافش منك. انا بحبك اوي بجد، بحبك و هخليك فخور بيا و عمري ما هعمل حاجة تزعلك".