ماجدة خير الله لـ مها أحمد: "هتساوي نفسك بالسقا وكرارة"

وقالت الناقدة في منشور آخر: "وهو طبيعي ان ممثل او ممثله يطلب من  زميل نجم  أن يرشحه في اي دور من المسلسل اللي هو بيشتغل فيه؟؟متجاهلا ان فيه حاجه اسمها مخرج وشركة انتاج؟ هما المسؤولين عن تسكين وتوزيع الادوار،ولما مايكونش فيه دور مناسب لهذا الممثل او الممثله العشمانه تشتغل في مسلسل الممثل النجم؟ تقوم تسخر منه وتهزأه وتقول عليه ندل".

وتابعت: " يعني ياتشوفلي شغلانه معاك، يا اما اسيحلك وابهدلك ؟؟ واتريق عليك؟؟  احنا بنهاجم اللي بيشغل مراته، طب ايه اخبار اللي يشغل صحابه حتي لو مش مناسبين ، حد يفهمنا كيف تدار المسائل في الوسط الفني، وسط العجائب والاعاجيب ، والشغل بالواسطه  ورمي الجته؟".

وفي أحد التعليقات ردت ماجدة على متابعيها: "وهل هتساوي نفسها لأحمد السقا أو كرارة!؟؟ اللي كل منهم كافح طول العشرين سنة أو يزيد حتى وصل لما هو فيه، ثم فلانة دي من امتى وهي بتاخد أدوار مؤثرة؟ كل تاريخها أدوار بسيطة جدا يمكن أن تلعبها أي ممثلة درجة تانية أو أقل؟!"

وكانت الفنانة مها أحمد ، قد نشرت فيديو عبر صفحتها الشخصية على موقع التواصل الاجتماعى فيس بوك بعد ما أثارته من منشور يتعلق بالفنان أحمد السقا وأمير كرارة ، للتوضيح لجمهورها قائلة" لما كتبت إمبارح كنت بعبر عن حاجة جوايا ، واستغربت جدا من الهجوم عليا .. ودى حكاية زى أى حكاية أنا بحكاية وعلشان كده عملت الفيديو ده للتوضيح علشان فى ناس بتصطاد فى الماية العكرة"، مضيفه حول تدوينتها التى اعتبرها البعض هجوم على الفنان أحمد السقا والفنان أمير كرارة " شئ طبيعى لما ألاقى حاجة تلفت نظرى ورد اعتبار بالنسبة ليا.. انا مش بشمت فى حد ولو بشمت كنت شمت فى نقسى انى قاعدة فى البيت".

وتابعت " جات عليا فترة أيام ماكنت بكبوظة كنت بشتغل كويس أوى .. وبعد ما عانيت من آلام فى الضهر والركب فعملت دايت قاسى جدا وخسيت .. وبعد ما خسيت قعدت فى البيت 3 سنين من غير شغل".

وقالت " قعدت فى البيت كتير وفضلت اسأل نفسى هو انا عملت حاجة .. لحد ما فى زميل قالى انتى عملتى صدمة لان الناس كانت حطاكى فى دور معين"