مها أحمد تبكي على الهواء: "أهالينا بيموتوا الصبح وبالليل نمثل"

انهارت الفنانة مها أحمد من البكاء على الهواء خلال تقديمها برنامج "تفاحة مصرية" على قناة "شمس"، قائلة: "فعلا الناس مبترحمش، الناس مبتقدرش يعني إيه كوميديان عنده مشاكل في بيته وعائلته وأولاده وجواه بيتقطع ويموت ومطلوب منه يبتسم على طول وميظهرش قد إيه هو بيتعذب".

أضافت: "يا سلام بقى لو غلط غلطة ميقصدهاش، كأن الناس مستنية ينهشوا في لحم دبيحة، إحنا اللي بنشيل كل حاجة، أهالينا بيبقوا ميتين الصبح وبالليل بنمثل ونعرض مسرح، أنا زوجي مجدي كامل والدته توفت الصبح ودفنها وراح يشتغل مسرح مع الفنان نور الشريف ومقدرش يعتذر عشان في منتج وتذاكر وجمهور جاي يشوف نجم كبير".

اختتمت: "أرجوكم الرحمة الرفق بالفنان شوية، مفيش رحمة من زمان أوي، حاولوا تفتكروا لكل واحد مننا قد إيه فرحكم، وأتحدى لو أي بيت في مصر ميفهوش حد عايز يمثل".