ضحايا متحرش المنزلة لـ"مصر تايمز": بقاله 3 سنين بيتعرض للبنات فى النهار
الثلاثاء 01/يونيو/2021 - 11:11 م
واقعة تحرش جديدة شهدتها شوارع مدينة المنزلة بمحافظة الدقهلية، بعدما أقدم خمسيني على التربص بالفتيات فى الشارع والتحرش بهن لفظيًا مستغلًا إمساكه بهاتفه المحمول لإخفاء فعلته، كما تبين أنه اعتاد ارتكاب هذه الوقائع مع عدد كبير من الفتيات القصر.
وتواصل "مصر تايمز" مع عدد من ضحايا "متحرش المنزلة" ليكشفن الستار عن ذئب بشري طليق فى شوارع محافظة الدقهلية.
قالت "منة"، الطالبة فى المرحلة الثانوية وإحدى ضحايا المتحرش، إنها كانت برفقة أصدقائها ولاحظت الشخص الظاهر فى الفيديو وهو ممسكًا بهاتفه ويقترب منهم ويتحرش بهن لفظيًا بأبشع الألفاظ، مشيرة إلى أنها تعرضت لذات الموقف من ذات الشخص منذ ما يقارب العام والنصف مما تسبب فى تعرضها لعدة أزمات نفسية.
وتابعت، أن المتهم اتخذ من المنطقة المحيطة بالمدرسة الثانوية بالمنزل مكانًا لارتكاب فعلته واعتاد على التحرش بعدد كبير من الفتيات بهذه الطريقة، مؤكدةً أن بعد نشرها للواقعة على حسابها الشخصى فوجئت بعدة فتيات يخبرنها عن تعرضهن لذا الموقف من ذات الشخص.
وأتمت الفتاة: "إحنا تعبنا من اللي بيحصل ده.. كل ما واحدة تعدى يرفع الموبايل ويوصف فى جسمها بألفاظ تقرف.. واتحرش قبل كدة بواحدة أعرفها ولما راجعنا الكاميرات دخل من شارع ضيق راح يتحرش بيها هناك".
بينما قالت ضحية آخرى للمتحرش: "الراجل ده واقف بقاله 3 سنين على الحال ده.. من وقت ما دخلت المدرسة وهو حاطط تليفونه على ودنه ويقرب مننا ويقول ألفاظ بشعة.. إحنا بقينا خايفين نمشي من الشارع ده لا يتعرضلنا.. بقاله 3 سنين بيتحرش بالبنات بالنهار ومحدش بيعمله حاجة".
وتابعت: "كل شوية نسمع أنه اتحرش ببنت ومشي وراها بنفس الطريقة دي.. الشوارع مبقتش أمان ومبقيناش نحب نمشي فيها".
فيما قالت آخرى: "إحنا كنا خارجين من المدرسة ولسة مخلصين امتحان.. لقينا واحد بيتكلم ورانا في التليفون وبيقول ألفاظ وحشة.. بصيناله لقيناه بيبعد وجرينا وراه لقيناه هرب ومشوفناهوش قصادنا.. قعدنا نعيط عشان حد يساعدنا ومن الخضة ففى شباب حاولوا يمسكوه وملحقهوش".
وناشدت الفتيات الأجهزة الأمنية بتحديد هوية المتحرش وسرعة ضبطه وإحضاره لاتخاذ الإجراءات اللازمة حياله، مؤكدين أنه تسبب فى حالة من الذعر والفزع بسبب أفعاله.
