لاعبة منتخب مصر تكشف تفاصيل الإطاحة بالفراعنة من تصفيات الأولمبياد
السبت 26/يونيو/2021 - 11:38 ص
قرر الاتحاد الإفريقي لكرة الطائرة الشاطئية استبعاد منتخب مصر للسيدات قبل انطلاق منافسات نصف نهائي التصفيات الإفريقية المؤهلة لأولمبياد طوكيو.
وجاء سبب الاستبعاد أن مسحة مدرب منتخب الرجاء جاءت إيجابية، وبناء عليه قرر الاتحاد الإفريقي استبعاد البعثة المصرية بالكامل بسبب المخالطة.
وكان منتخب السيدات قد تأهل إلى نصف نهائي التصفيات المقامة في المغرب بالفوز على رواندا فى دور ربع النهائى بنتيجة 2/1 بالمباراة الذهبية، وكان من المقرر أن يواجه نيجيريا في مباراة صباح اليوم السبت.
وكتبت دعاء غباشى لاعبة منتخب السيدات عبر حسابها الرسمى على موقع التواصل الاجتماعى "فيس بوك": "بكل هدوء إحنا لاعيبه حلمنا من 2016 التأهل للأولمبياد وبقالنا 5 سنوات بنتمرن عشان البطولة دى تيجى وتكون فى المغرب اللى هى البلد المنافس أصلا عملنا مسحة قبل ما نسافر طلعت سلبى وماسحة أول ما وصلنا وبرضه طلعت سلبى وقايلين كلهم إن اغادير مفهاش كورورنا وإنهم بيعملو كده عشان يحافظوا على البلد أول ما وصلنا اتعمل مسحى وفضلنا 3 أيام فى الغرف عشان النتيجه تطلع ومرضوش يخرجونا من الأوضة غير إما النتيجة تطلع وطلعت سلبى الحمد لله".
وأضافت: "من 3 أيام فجأة قالو كله ينزل يعمل مسحة مع إنهم أصلا مكنوش قايلين إن فى مسحة هتتعمل تانى عشان المفروض إننا فى فقاعة فى فندق فيه 100 الف شخص ونصهم سياح بره البطولة امبارح الساعة 11 بليل بتوقيت مصر قالو مصر متخرجش برة الأوض عندهم حالة إزاى وامتى وكلنا كويسين قلنالهم مين قالو مدرب فرقه الرجال، طب هنعمل ايه يا جماعة قالو هنلعب لحد ما اللجنة الطبية تاخد قرار ماتشنا انهاردة الساعة 9 الصبح طبعا نمنا كلنا اللاعيبه بعد ما اتاكدنا إننا هنلعب بعد توتر وعياط وصويت، فجأة نصحى على رسالة الساعة 3:30 توقيت مصر 4:30 متخرجوش من الأوض انتو برة البطولة".
وأكملت: "يرضى مين ده يا عالم يرضى مين، دى لعبة واحنا متاكدين منها المدرب سليم ومع العلم ممنوع حتى نجيب حد يعملنا مسحات تانيه ولا حتى فكروا يعيدو المسحه ولا اصلا شوفنا ورق المدرب اللى بيقولوا إنه ايجابي".
وأضافت: "احنا ماتشنا الساعة 9 الصبح يعنى كام ساعة ماتش ضمنينهه نكسبه نكون فى النهائى احنا مخالطين جميع اللعيبه ومخالطين فرقه المغرب والفرق الى لعبناها والحكام والناس اللى فى المدرجات الى هما منظمين احنا مخالطين رئيسة الإتحاد الأفريقى اللى هى رئيسة اتحاد المغرب أصلا يعنى لو فى فعلا حق يبقى المنتخبات كلها يتعملها ماسحل اشمعنا مصر هى اللى ايجابى ولو ايجابى هتبقى ايجابى من مين من نفسها يعنى، حد يلحقنا والنبى احنا حلمنا فجاه بقى تراب ومش عارفين نعمل حاجة، يارب انت حسبى ونعم الوكيل".
