طبيبة مشهورة تحذر من شراء سيارة "بيجو 5008" بعد نجاتها وأسرتها من الموت

حذرت الدكتورة نورهان قنديل أخصائية التغذية من شراء سيارة بيجو 5008 بعد نجاتها وأسرتها من حادث تعرضت له بسبب سوء السيارة وعدم توافر الإمكانيات اللازمة للأمان بها بالإضافة إلى سوء الصيانة بها ـ على حد قولها.

وقالت الدكتورة نورهان عبر صفحتها الرسمية على موقع التواصل الاجتماعى " الحمد لله انا و اسرتى نجونا و ده ستر ربنا  ..اولا العربية اللى اسمها بيجو 5008 دى محدش يفكر يشتريها ، دى لا تنفع اسرة 7 افراد ولا تنفع فرد واحد و دى شركة غير مسئولة ..عربية مكملتش 3 الاف كيلو و لسه عاملة صيانة الألف يوم الخميس اللى فات و يحصل فينا كدة على الطريق ..دموع بناتى و رعشة ايدى و انا بحضنهم دى تمنها غالى اوى".

وتابعت "تانى حاجة خدمة الأنقاذ التابعة ليهم مستواها تحت الصفر و حطونى تحت ظعط اكتر من اللى انا فيه تحت الشمس و بيتعاملوا بكل هدوء و بطيء ..ثالثا الادوات المتاحة لتغيير الكاوتش عجيبة و مش كاملة ولا السواق ولا اى عربية تانية عارفة تعمل بيها حاجة لو العربية قديمة كنت قلت انا ضيعت منها حاجة لكن دى عربية مكملتش اسابيع فى البيت.. رابعا كل اللى يشوف المنظر يقول ده اكيد كاوتش قديم و ازاى حصل كدة و 100 سؤال".

وقالت" حسبى الله و نعم الوكيل ..اللى متابعنى من زمان عارف انى عمرى ما عملت كدة و كتير سامحت فى حقى عن قوة مش عن ضعف لأنى واخدة قرار ان السوشيال ميديا مش مكان اخد منه حقى ولا للتشهير بشخص او شركة و دايما بفكر فى الموظفين اللى فى المكان اللى تجربتى معاه سيئة و اقول إيه دنبهم .. بس المرة دى غير .. ده حق اسرتى .. و كلامى على عربية يتم التسويق ليها انها عائلية؟ ليه علشان واسعة !!! لا شكرا فين الأمان ؟!!!! فين حتى سهولة تركيب الأستبن لو كان يعنى الكاوتش اتخرم و كدة ذى الناس العادية؟! لكن كاوتش يحصله كده فجأة و هو جديد و احنا فى نصف طريق سريع!!!! اولا محتاحة تفسير؟!!

واستطردت" الشركة دى محتاجة تقعد مع نفسها و تستوعب مسئولية كام اسرة فى رقبتهم و ان عربية ذى دى متنفعش تماما لأسرة و المضحك و اللى خلانى اكتب البوست انهم بيقولولى ان العربية دى بتبيع كتير جدا و انا الوحيدة اللى حصل معاها كدة و ده حظهم الحلو جدا علشان اكيد ده نصيب علشان اكون انا السبب ان غيرى ميحصلش معاه كدة ..توكيل بيجو مصر … من حظى السعيد انى مكنتش جزء من جريمتكوا فى التسويق للعربية دى فى مصر ( كانوا عارضين عليه يبعتوها للتجربة اسبوع و طبعا كانوا هيبعتوا حاجة افضل ) و من حظكم التعيس انى روحت اشتريت عربية عادية من معرض عربيات (الليثى) اللى رشحكوا ليه العربية بقوة و قالولى غير انها هايلة فالتوكيل حبايبنا و اى حاجة هيكونوا تحت امرك و فى النهاية الليثى بيقولوا احنا مش هنسيب بيجو و فى الوقت نفسه مش عارفين لمدة اكتر من ٣ ساعات يحيبولى ونش حتى ياخدنا

واختتمت حديثها قائلة" المهم دلوقتى مستنية اعرف هتعملوا ايه فى العربيات اللى اشترتها اكتر من اسرة؟!!!! قبل ما اعرف هتعملوا ايه فى عربيتى".