شاهد بـ"رشوة الصحة" يكشف تفاصيل استغلال اسم وزيرة الصحة في القضية

قال الشاهد الثالث في القضية المعروفة إعلاميًا بـ"رشوة الصحة" أمام هيئة المحكمة: "لما كلمت المتهم الثالث عشان يخفض مبلغ الرشوة.. قالي ماشي وعمل معاهم تليفون وعرفت ان المبلغ اتخفض من ٥ مليون لـ ١٠ مليون.. بس هما طلبوا شيكات كضمان.. بعد كدة تم التوقيع على الشيكات في بيتي بناء على طلب المتهم الثالث اللي قالي الشيكات دي هتتوقع عندك في البيت.. كتبنا ١٢ شيك كل شيك بـ ٢٥٠ ألف جنيه وكلها اتكتبت باسم المتهم الثاني بناء على طلب المتهم الثالث".

وتابع: "بقيت أنا وحسام بنتكلم على طول.. وهو قالنا اعملوا طلب معاينة جديد للمستشفى.. وطلبوا طلبات كتيرة جدا وعشان يخلصوها محتاجين ١٥ يوم.. بعد كدة طلبوا مننا مبلغ من الرشوة قبل الحصول على التراخيص.. المتهم الثالث كلمني قلتله إحنا مش متفقين على كدة.. قاللي بالنص إن المتهم الثالث الدنيا بتاعته واقفة وطلع قرار غلق ومشى الناس.. والورق بتاعكوا كله كان مرفوض واليوم اللي بعده اتقبل.. وقالنا مش هنعمل أي حاجة غير لما تدفعوا ".

وقال: "بعد كدة المتهم الثالث حدد معايا معاد عشان أسمله الشيكات وقالي يا تيجي قبل المعاد بساعة يا تبعتلي الشيكات مع السواق.. عشان الراجل الكبير هيكون موجود.. لما سألته مين ده قاللي جوز الوزيرة.. وأنا رديت عليه وقلتله ميشرفنيش أني أقعد معاك.. بعد لما قابلتهم المتهم الأول قال أنا عايز ٧٥٠ ألف جنيه ضروري ومصمم عليهم لحد ما قدرنا ننزلهم لـ٦٠٠ ألف جنيه.. وقالي أنا هديك رقم حساب بتاع شركة عقارات تحط فيهم ٤٠٠ ألف جنيه والرقم التاني لحسابه الشخصي قالي حطلي فيهم ٢٠٠ ألف جنيه". 

وأورد: "لما سألت طيب إفرضوا الوزيرة مشيت إيه اللي هيتم.. قالولي لأ هي مش هتمشي دلوقتي".