"فضحنا دوليا".. رئيسة المصري لحقوق المرأة تطالب بالقبض على عريس الإسماعيلية
الأحد 20/فبراير/2022 - 11:28 م
طالبت المحامية نهاد أبو القمصان، بالقبض على عريس الاسماعلية قائلة : "إحنا قدام مجموعة من الجرائم ومش عارفة لية متقبضش عليه، هي تسامح ماشي، لكن قيم الأسرة المصرية فين!، ده فضحنا دوليا ومحليًا، وممكن يتحاسب بالمادة 25 من قانون جرائم الإنترنت".
وتساءلت ابوالقمصان، في مداخلة هاتفية خلال برنامج " كلمة أخيرة " الذي تقدمه الاعلامية لميس الحديدي على شاشة "ON" قائلة :"لما البنات بتوع التيك توك طلعوا رقصوا قفشوهم لية! هي قيم الأسرة اتخضت أوي ومنامتش الليل عشان بنت رقصت على التيك توك، وهذا لم يحدث في واقعة ضرب عروس الإسماعيلية".
وأضافت كذلك أن "وزارة التضامن عندها مكان لاستضافة السيدات المعنفات، ولكن معندناش غير 8 بيوت استضافة، ومحتاجين زيادة، وتعاون مع وزارة الداخلية"، كما وجهت رسالة للفتيات قائلة : "الست اللي تضرب ممكن تكلم المجلس القومي للمرأة أو الشرطة".
كما وجهت أيضًا، رسالة للرجال الذين يمارسون العنف قائلة : "الراجل الضعيف الفاشل هو اللي يمد إيده على مراته، ولو عارف إنه لما هيمد إيده هي هتضربه أو أهلها هيطحنوه مش هيمد إيده، وهو بيمد إيده عشان هي أضعف منه، برنس الليالي ضراب النساء ده ميعرفش يضرب شوال خيار في السوق، لأنه لو ضرب شوال الخيار هيبوظ منه كام كيلو وهيدفع تمنهم، لكن هو فش غله في البت الغلبانة".
واختمت ابوالقمصان تعليقهًا: "مفيش راجل محترم يعمل كدة، ولازم يتقبض عليه، ده لو راجل باس مراته في الشارع بتتعمله قضية، وده لازم يتعالج ويتأهل لأنه مش عارف يسيطر على غضبه".
