عمر كمال يرد على منتقديه بسبب سخريته من التعليم والشهادات

دافع مطرب المهرجانات عمر كمال على الهجوم الكبير الى شن عليه، بسبب منشوره على حسابه الشخصي على موقع التواصل الاجتماعي "فيس بوك"، والذى راه البعض بأنه سخرية بالعلم وأصحاب الشهادات، و نشر صور لتكريماته على نجاحه فى الغناء، وقال : "إركن شهادتك على جمب لو ربنا مأذنشى واشتغلت بيها وشمر واشتغل وحقق حلمك"، وحاول عمر تفسير الأمر، مؤكدا أنه لم يقصد هذا المعنى السيئ.

وكتب على حسابه "فيس بوك" "فيه رقم محطوط للحجوزات على الصفحة عشان الشغل والأفراح والحفلات.. من اكتر المكالمات اللى بتيجى عاوزين شغل ومفيش شغل عندكم عشان احنا محتاجين شغل شئ محزن جدا لأنهم شباب فى سنى.. فا بحب بين كل فترة والتانية أكتب بوست للناس فيه تشجيع ودافع إن خلى جواك إيمان بنفسك وأمل فى ربنا وان كل حاجة هاتتعدل".

وأضاف: "أنا شاب اخدت دبلوم صنايع وكملت دراسة مزيكا فى معهد الموسيقى العربية.. ولما خلصت ملقتش فرصة أغنى فى الطرق العادية زى قصور الثقافة و الأوبرا وكده .. فقررت اعتمد على نفسى واشتغل كل حاجة وحرفيا شمرت واشتغلت ومشيت فى كل الطرق اللى توصلنى لهدفى".

ولذلك "كتبت بوست على اساس ده اللى هو شيل شهادتك على جمب لو مشتغلتش بيها وانزل وشمر واسعى لحلمك وهدفك وحققه وحطيت صورة لتكريمات وجوايز نتيجة لنجاحى فى المجال وطبعا قصدى إن كل واحد فى مجاله يجتهد مش يسيب شهادته ويروح يغنى أكيد.. إيه الغلط فى كده يا جماعة".